14 ka priso nikuha og eligibility exams

CEBU, Philippines – Katorse ka mga priso sa Bureau of Jail Management and Penology-7 ang mikuha og civil service eligibility examinations kahapon diha sa buhatan sa Civil Service Commission-7.

Sumala ni Dixie Gonzales, ang hepe sa Examination Services Division sa CSC-7, nga pito ka mga priso ang mikuha og professional examination samtang ang pito mikuha usab og sub-professional.

Dugang pa ni Gonzales nga mitugot ang ilang buhatan sa pagpa-eksamin kanila human giaprubahan sa CSC central office ang hangyo ni BJMP Regional Director Superintendent Serafin Barreto Jr. niadtong Pebrero 12 ning tuiga.

Kini human miisyu ang korte og kamandoan nga nagtugot sa mga priso nga mokuha sa maong pasulit.

Matud ni Gonzales nga tanang Filipino nga nagpangidaron og 18 anyos mahimong mokuha og eligibility exam apil na ang mga priso nga wa pa nakombikto.

“Must have not been convicted by final judgment of an offense or crime involving moral turpitude, or disgraceful or immoral conduct, dishonestly, examination irregularity, drunkenness or addiction to drugs,” sigun ni Gonzales.

Kun nakapasar apan nakombikto sa krimeng gibuhat, ang bakwion ang ilang eligibility base sa Section 2 (a) sa Revised Rules on Administrative Cases in Civil Service.

“Applicants with pending administrative and/or criminal cases may take the examination and shall be conferred the eligibility if they successfully pass the same. However, this is without prejudice to the outcome of their pending cases. If they are found guilty of grave offenses, their eligibility shall be forfeited,” sumala pa sa Section 2 (a).

Matud ni Gonzales nga 80 porsiyento ang passing rate sa maong exam. Ang resulta unya niini ipagawas 41 ka adlaw gikan sa pasulit.

Si Jonathan Medina, Senior Jail Officer 2 sa Mandaue City Jail Male Dormitory nagkanayon, dako ang pagsalig nga mopasar ang unom nila ka priso tungod kay ilang nakita nga seryoso sila sa ilang pagtuon.

“We've given them books and reviewers to read and every week we had this question and answer session as well as discussions on general information,” segun niya.

Apan, sumala ni Gonzales dihang nahinabi sa Banat News nga dili lang basihan ang pagpasar sa eligibility exam aron makatrabaho sa buhatan sa gobiyerno.

Dul-an 10,600 ang mikuha og Professional ug Sub-professional exams sa tibuok rehiyon kagahapon.

Ang Professional ug Sub-professional career service eligibility  usa sa mga rekisitos niadtong buot manarbaho sa mga ahensya sa gobiyerno, pwera na lang kadtong mga posisyon nga sakop sa Special Laws. - /EIM) (BANAT NEWS)