Pari bawal sa photo ops

CEBU, Philippines – Dili na motugot ang Simbahang Katoliko nga ipahigayon ang mga aktibidades kalabot sa politika sulod sa simbahan, lakip na ang pag-apil sa pari sa pagpalitrato kauban ang mga politiko.

Kini maoy kalakip sa election guidelines nga ipagawas karong semanaha aron magpabilin nga neutral ang simbahan gikan sa politikanhong kalihokan.

Sumala ni Auxillary Bishop Dennis Villarojo sa Archdiocese sa Cebu nga ang guidelines giduso na ngadto ni Arsobispo Jose Palma alang sa iyang pag-aprobar.

Matud ni Villarojo nga lakip sa unod sa guidelines ang pagdili sa mga politiko nga mamahayag sud sa simbahan ilabi na duol sa sagradong altar.

“Usa sa  mga punto nga gihimon'g guidelines kabahin sa pagdawat og requests concerning masses or blessings related to political agenda or elections event. Mao nga ang pari mo-excuse sa iyang kaugalingon sa panahon nga mag-photo opportunity.

Dili lang unta moapil ang pari during the picture taking aron dili ma-perceive nga ang simbahan ug ang pari dunay gidapigan bisan kinsa nga kandidato,” sigun ni Villarojo.

Gitataw ni Villarojo nga dili nila madid-an ang mga pari nga nipahigayon og Misa alang sa mga political parties gumikan kay ang guidelines wa pa man naumol kaniadto.

Giklaro usab ni Villarojo, nga wala magpasabot nga ang pari nidapig sa usa ka politiko o partido tungod lang kay diha siya sa ilang kalihokan.

Kini human nga adunay nigawas nga pagsaway batok sa mga pari nga nitambong sa mga kalihokan sa mga politiko, apan diay to ang papel nila mao ang pag-selebrar sa Santos nga Misa sa maong kalihokan.

Si Villarojo nagkanayon nga pinaagi sa maong election guidelines dili na maduhig ang simbahan sa isyu sa politika.

“Looking forward to the future, based on the guidelines, nga human sa Mass wala nay political speeches and overtly partisan acts diha sulod simbahan o unsa mang pagpadayag ug pagpakita og partisan acts,” sigun niya. - /EIM) (BANAT NEWS)