Padayung serbisyo pasalig ni Radaza

CEBU, Philippines - Giubanan gyud ni kanhi kongresista Arturo “Boy” Radaza ang iya’ng kapikas nga si Lapu-Lapu City Mayor Paz Radaza ug anak nga si Kong. Aileen Radaza sa pagduso sa ila’ng Certificate of Candidacy kagahapon alang sa pagpasubli sa sama’ng posisyon.

Kuyog nila ang runningmate ni Radaza nga si Bise Mayor Marcial Ycong ug mga konsehal nga sila si Harry Radaza, Leo Mercado, Elias Berdin, Roque Wagwag, Eduado Patalinghug, Melisa Vidal, Ricardo Amores, Nelson Yap, Flaviano Hiyas Jr., Gregorio Paquibot Jr., Damian Gomes ug Cipriano Flores.

Sa buhatan sa Commission on Elections gisugat ang grupo sa ila’ng mga supporters bisan naglagiting ang kainit. Ang Team Deretso lakip na ang mga supporters nagsul-ob og yellow nga T-shirts nga mao’y political color sa Liberal Party diin nahisakop ang grupo.

Matud ni Mayor Radaza nga karon nga nakasang-at na sila sa ila’ng COC, lauman sa mga Oponganon ang good governance lakip na ang serbisyo alang gyud sa katawhan.

“Anyway, ila na’ng panan-aw, but then kun moingon sad ta sa amo’ng panan-aw hinuon dili man ko moingon nga fully accomplished gyud tanan but we’re into it nga amo’ng gipanan-aw kay limitado ra man gud ang income sa siyudad, but we did our best, I don’t know sa ila’ng panan-aw,” tubag ni Radaza sa pagsaway sa kaatbang.

Nasayran nga lima ka kandidato ang magpapili sa pagka-mayor sa dakbayan sa Lapu-Lapu nga gilangkuban nila’ng Engr. Rolando Patalinjug, Angel Rodriguez, Prospero Cabahug, Efrain Pelaez ug Paz Radaza. (Decemay P. Padilla/GMR)(BANAT NEWS)