Canoy nahiubos ni Davide
CEBU, Philippines - Nanghinaut si Gobernador Hilario Davide III nga dili maputol ang ila’ng panaghigala ni San Fernando Mayor Antonio Canoy tungod kay wala kini niya hatagi og Certificate of Nomination and Acceptance sa Liberal Party.
Gipasabot ni Davide nga si Mar Roxas kinsa mao’y chairman sa LP pabor kang Kongresista Gerald Anthony “Samsam” Gullas, Jr. nga kaatbang ni Canoy.
Nunot niini si Canoy nitapon sa Nationalist People’s Coalition (NPC) nga maoy nihatag kaniya sa CONA samtang siya nahiubos kang Davide.
Gibutyag ni Davide nga nangayo siya og pasaylo ug gipasabot niya si Canoy.
Si Davide nanghinaut nga makasabot si Canoy tungod kay daghan kaayo ang posible’ng mahitabo sa politika ug bug-at usab sa iya’ng bahin ang hitabo ilabi na nga nagkauban sila ni Canoy niadto’ng 2010 ug 2013 nga eleksiyon.
“I just hope that we remain friends that’s what he said pud nga migo lang gihapon,” dugang ni Davide.
Gibasol ni Canoy ang mga Gullas kinsa makaatbang niya sa eleksiyon sunod tuig si Samsam nga apo ni kanhi kongresista Eduardo Gullas kinsa kandidato sa pagka-mayor sa dakbayan sa Talisay.
Si Canoy nipasangil nga ang mga Gullas niduot kaniya aron mapalagpot siya sa politika ug wala na’y moatbang kanila.
Si Samsam sa iya’ng bahin nagkanayon nga wala sila’y labot kung wala mahatagi og CONA si Canoy sa LP.
“Kinsa man intawon mi nga naa’y say sa Liberal? We are Nacionalista Party,” matud ni Samsam.
Matud ni Samsam nga personal nga desisyon sa LP kung duna kini’y gihatagan og bendisyon sa una’ng distrito sa Sugbo.
Dugang ni Samsam nga si Canoy usa ka lig-on nga kaatbang ug nangandam na usab siya niini. (Brenda D. Batuto/GMR)(BANAT NEWS)
- Latest
