Supporters sa team rama nidagsa

CEBU, Philippines - Nanghinaut ang Team Rama nga sama ka init ang suporta nga ihatag sa ila’ng mga supporters atol sa pagduso sa certificate of candidacy kagahapon hangtud sa eleksiyon.

Gibanabana’ng dos mil kapin ka supporters sa Team Rama ang nikuyog gikan sa Cebu Metropolitan Cathedral hangtud na sa buhatan sa Commission on Elections.

Matud ni Bise Mayor Edgardo Labella nga wala sila magdahum sa kadaghan nga nidagsa aron mosuporta alang sa Team Rama.

Gihulagway ni Labella nga makita sa mga nawong sa katawhan nga dili lang basta-basta nga suporta ang ila’ng gipakita apan may emosyon ug sinseridad alang kanila.

Nagkanayun si Labella nga wala siya nasayud kun unsa gyud ang nakapaaghat sa katawhan nga grabe ang suporta nga gipakita nila sa Team Rama.

Mapasalamaton usab si Mayor Michael Rama sa kadaghan sa mga supporters nga nitambong ug na-emotional siya tungod kay nakahinumdum siya sa iya’ng mga ginikanan ug nanghinaut nga naa pa unta ang iya’ng ginikanan aron kini makasaksi kaniya.

Si Police Chief Inspector Jose Gesto, hepe sa Waterfront Police Station nibutyag sa Banat News nga malinawon ra ang pagsang-at sa COC sa Team Rama.

Sumala pa ni Atty. Marchel Sarno, election officer nga gitahasan sa pagdawat sa tanang COC, nga ila pa’ng susihon kung pila gyud sa kinatibuk-an ang niduso sa ila’ng COC atol sa pagtak-op sa pagpanawat niini. (Sheriza Mae R. Uy ug Rowena D. Capistrano/GMR)(BANAT NEWS)