My Cebu Bus gisupak
CEBU, Philippines - Gipadayag sa transport groups sa Sugbo ang ila’ng pagsupak sa 77 ka High Quality Public Transport System (HQPTS) nga padaganon sa Metro Cebu.
Ang grupo nipahigayon og lihok protesta atubangan sa buhatan sa Land Transportation Franchising and Regulatory Board-7.
Sila niprotesta tungod kay alang nila posible’ng maapektuhan ang ila’ng panginabuhi kun magdagan na ang mao’ng mga bus.
Una niini, usa ka public hearing ang gipahigayon sa LTFRB-7 diin nisang-at ang tulo ka pundok sa mga operators sa Sugbo sa ila’ng pagsupak sa My Cebu Bus.
Apan si Atty. Jomar Castillo, representante sa Metro Rapid Transit System Inc., ug legal officer sa SM Malls, nipadayag nga kompiyansa sila nga aprobahan sa LTFRB ang ila’ng franchise request.
Gibutyag hinuon sa legal officer sa LTFRB 7, Atty. Edwin Antepuesto, nga susihon pa nila ang mga dokumento ug kun aduna'y punto nga makita ila kini’ng ipasaka sa kaulohan alang sa laing pakisusi.
Dugang ni Castillo nga kun madawat na nila ang franchise magsugod dayun sila sa pagpadagan sa mga My Cebu Bus.
Samtang suportado usab sa Movement for a Livable Cebu (MLC) ang mga bus. (Decemay P. Padilla/GMR)(BANAT NEWS)
- Latest
