P3M shabu nasakmit

CEBU, Philippines - Mokabat ngadto sa P3.5 milyones nga kantidad sa gituohang shabu ang nasakmit sa kapulisan gikan sa usa ka 18-anyos nga lalaki atol sa gipahigayon nga operasyon sa illegal nga drugas sa barangay Duljo-Fatima dakbayan sa Sugbo kagahapon sa buntag.

Si Jovito Apaap, nga taga barangay Mambaling, ang naposasan sa mga sakop sa Cebu City Intelligence Branch human kini mitunol og pakete sa gituohang illegal nga drugas ngadto sa police asset.

Matud ni Superintendent Romeo Santander, ang hepe sa CIB, nga si Apaap usa sa mga bata-bata sa usa ka drug pusher nga gihinganlan og “Joefel” ug maoy tighatod niini og shabu ngadto sa mga kustomer.

Si “Joefel” giingon nga nabuhatan na usab og buy-bust operation sa mga kawani sa Philippine Drug Enforcement Ageny-7 Hulyo karong tuiga apan nakaikyas tungod kay bata-bata lang pud niini ang iyang gisugo sa paghatod sa drugas nga mitimbang og usa ka kilo.

Sigon ni Santander nga ang ilang gibuhat nga operasyon kagahapon parti na sa ilang pag-follow-up sa mga illegal nga buhat nga anaa sa Barangay Duljo-Fatima.

Matud niya nga ila gyud nga target mao si Apaap human sila makadawat og taho nga ang 18-anyos gyud ang pirmi sugoon, modunol sa illegal nga drugas og modawat sa kwarta.

“This is not the first time nga nagdala-dala siya as a drug courier so atong gi-conduct-kan (og anti-illegal drug operation),” matud ni Santander.

Mga alas 12 sa udto kagahapon, gipahigayon sa mga kawani sa CIB ang operasyon ug didto ila gyud nadakpan si Apaap human kini mitunol og pakete sa shabu nga gipalit sa kapulisan sa kantidad nga P20 mil.

Apan nasakpan sa kapulisan nga nagdala pa siya og lain pa nga mga pakete sa shabu. “Above five grams ang kunohay gipalit namo pero daghan diay iyang nadala,” matud ni Santander.

Si Apaap nakuhaan og duha ka dagko ug usa ka medium nga pakete sa shabu nga motimbang ngadto sa 300 ka gramos ug mokantidad ngadto sa P3, 540,000 base sa Dangerous Drugs Board value.

Sa pakighinabi ni Apaap sa tigbalita kagahapon, siya miingon nga wala siya mahibawo kung unsa ‘to ang iyang gitunol kay giputos kini og karton.

Matud niya nga igo ra siya gisugo ni “Joefel” nga ipahatag ang butang ngadto sa nakasakyanan og itom nga sakyanan na diay sa kapulisan.

“Karon ra gyud ko kasuway ani. Nangutana gani ko niya unsa ni, ingon man siya basta ipatunol lang unya tagaan ko og P300. Nahibong lang ko nga gidakop na lang ko og kalit,” matud ni Apaap.

Hinuon, si Apaap mitug-an nga mogamit pud siya og illegal nga drugas usahay.  Siya usab nangambot kung asa na ang iyang amigo nga si “Joefel.” (Ma. Fatima Secuya/EIM)(BANAT NEWS)