Sakto’ng paghugas sa kamot gitudlo

CEBU, Philippines - Dul-an sa 200 ka tinun-an sa Grade 1 ug 4 ang niapil sa Global Hand Washing Day kagahapon sa Mabolo Elementary School sa siyudad sa Sugbo dungan sa kalihukan sa Manila ug Davao.

Ang mga tinun-an sa Science class ang nihugas sa ila’ng mga kamot gamit ang usa ka sabon tumong sa pagpalapad sa kampanya may labot sa ka-importante sa hand washing. Sigun ni Dr. Sophia Mancao, OIC Assistant Regional Director sa Department of Health-7 nga importante nga mahibawo ang kabataan sa pamaagi sa paghugas sa kamot tungod kay dinhi sagad naggikan ang sakit.

Sumala pa sa World Health Organization, 13 ka bata ang patay matag adlaw tungod sa diarrhea sa tibuok kalibutan.

Sa Pilipinas, gibana-bana nga adunay 37 ka bata ang mamatay matag adlaw nga nagpangedaron og 5-anyos paubos tungod sa sakit nga pneumonia.

Nasuta nga ang diarrhea ug pneumonia ang nagpabilin nga nag-una’ng sakit ug mao’y hinungdan sa kamatayon sa mga bata diin sagad sa kagaw niini gikan sa kamot. Usa ang ubo ug sip-on nga resulta sa hugaw nga kamot.

Gikinahanglan usab nga mamahimong awareness ang hand washing ingon man ang importansiya niini.

Gisugdan ang Global Hand Washing Day niadto’ng tuig 2008 ug ipahigayon kini matag Oktubre 15. Ang principal sa tunghaan nga si Teresita Manzanares mapasalamaton nga napili ang ila’ng tunghaan sa tinuig nga kalihukan.

Kuyog sa mga tinun-an ang ila’ng mga ginikanan sa Don Bernardo Benedicto Cultural Center sa mao’ng tunghaan.

Aduna'y duwa nga gipahigayon kagahapon nga gisalmutan sa mga bata sa pagsuta sa bacteria ug germs sa gi-set-up sa grupo sa Procter and Gamble Philippines.

Ang Safeguard sa P&G mao ang gigamit sa mga tinun-an nga sabon nga girekomendar nga makatangtang sa kagaw.  (BANAT NEWS)