One Cebu sa Toledo wa’y mayor
CEBU, Philippines - Nakaduso na sa ila’ng certificate of candidacy ang mga kandidato sa One Cebu Party sa dakbayan sa Toledo nga gilangkuban lang sa bise mayor ug upat ka konsehal.
Ang numero uno’ng konsehal, Ricardo “Kuya Nick” Pepito, ang kandidato sa pagka-bise mayor ug iya’ng mga konsehal sila si kanhi mayor Arlene “Daydee” Zambo, Konsehal Louie Nicholas Espinosa, kanhi konsehal Eric Espinosa ug kanhi bokal Caesar Ian Zambo kinsa wala nakadungan kagahapon sa pagsang-at sa COC.
Nakaaghat sa One Cebu Party nga dili atbangan si Mayor John Henry “Sonny” Osmeña human kini nipadayag og suporta kang Kongresista Gwendolyn Garcia.
Ikaatbang ni Pepito si Bise Mayor Antonio Yapha Jr. sa Liberal Party.
Si Pepito motapos na sa ikatulo’ng termino isip konsehal. Una siya’ng napili nga numero uno’ng konsehal niadto’ng 2001 sa una’ng pagsalmot sa politika apan nidagan sa pagkasakop sa hunta probinsiyal sa 2004 ug napilde.
Nibalik siya paglansar sa 2007 ug nahimo’ng ika-pito sa 10 ka konsehal apan nibalik nga numero sa 2010 ug 2013 nga eleksiyon.
"This is my last term, I am consistent number one city councilor. Ako lang suwayan basin og matagaan og laing higayon ato’ng lapad-laparan ang serbisyo sa ato’ng siyudad," matud ni Pepito. Samtang dili pa tanan kandidato sa LP ang nakaduso sa ila’ng COC kagahapon nga gipangulohan ni Konsehal James Yared Gaite sa pagka-mayor sa siyudad.
Karong adlawa gikatakda usab nga moduso sa COC si Osmeña sa pagka-mayor. (BANAT NEWS)
- Latest
