Manimpohay sa ospital nadakpan

CEBU, Philippines - Nasikop sa kapolisan ang usa ka lalaki nga manimpohay sa mga pribadong hospital sa dakbayan sa Sugbo human kini suway nga mipailis sa tseke nga iyang nakuha niini gikan sa iyang nabiktima. “Sus, bogo-a g’yud nako,” mao na lay nasulti ni Albert "Mark" Tumagna, taga Alaska, Mambaling apan taga Dipolog City human siya nasakpan.

Matud pa ni Chief Inspector David Señor,  hepe sa Fuente Police Station nga nasikop ang suspek dihang misulay siya pailis sa P13,600 nga ”pay to the order of cash” nga tseke.

Nagtoo si Tumagna nga makalusot ra siya apan wa niya damha nga polis nay misugat niya pipila ka gutlo sa ilang pakig-estorya sa teller sa BPI Savings Bank Colon Branch.

Matud pa ni Señor nga gipinahan na diay sa tag-iya sa bank account nga si Eugene Abello nga ipa-cancel ang maong tseke tungod kay gikawat kini.

Matud pa ni Señor nga modus sa maong lalaki nga magsuroy-suroy sa mga hospital ug magpatoo nga kauban kini sa pasyente apan mangawat ra diay sa sud. Niadtong Oktobre 8 nakadala gyud siya sa driver's license, SSS Identification Card, BPI ATM Card, P6,500 cash ug ang maong tseke. (BANAT NEWS)