Yayoy mag-mayor sa Carcar
CEBU, Philippines - Nihural kagahapon sa buntag kang Gobernador Hilario Davide III ang grupo ni Bokal Raul “Yayoy” Alcoseba kinsa magpapili’ng mayor sa dakbayan sa Carcar.
Una’ng termino pa ni Alcoseba sa hunta probinsiyal gikan sa una’ng distrito nga kaalyado sa Liberal Party (LP) ug makig-atbang kang Mayor Nicepuro Apura.
Si Roberto “Badong” Aleonar, Jr. ang runningmate ni Alcoseba samtang ilang mga konsehal sila si Roy Velez, Archilles “Arki” Gantangco, Jeson Fernandez, Giovanni Quijano, Leonila Sato, Edgardo Alcover, Philip Perez, Jufhel Alcuizar, Elaine Mae Almeñana ug Atty. Juric Sato.
Sila si Velez, Gantangco, Fernandez ug Quijano mga incumbent ug kanhi kaalyado ni Apura sa Alayon Party.
Si Alcoseba nagkanayon nga daku’ng sakripisyo sa iya’ng pamilya ang iya’ng paghukom nga modagan isip mayor sa Carcar nga unta aduna pa siya’y duha ka termino sa hunta probinsiyal.
Apan nakita niya nga aduna siya’y dag-anan batok ni Apura.
Dugang ni Alcoseba nga usa sa isyu nga iya’ng tutukan ang problema sa kahusay ug kalinaw sa siyudad.
Karong adlawa ang grupo ni Alcoseba gikatakda’ng moduso sa ila’ng certificate of candidacy human sa usa ka Santos nga Misa sa Saint Catherine Church sa siyudad. (BANAT NEWS)
- Latest
