Proklamasyon sulod sa simbahan gidili

CEBU, Philippines - Gipanday karon ang lagda sa simbahan labot sa nagsingabot nga eleksiyon.

Lakip   niini ang pagdili sa mga pakigpulong ug pagdala og campaign materials sulod sa simbahan aron mapreserbar ang ka sagrado sa simbahan.

Ang mao’ng guidelines ipangapod-apod sa tibuok simbahan sa Archdiocese of Cebu kung kini mahuman na ug mapirmahan na usab ni Archbishop Jose Palma kinsa tua pa sa Roma.

Apan si Archbishop Emeritus Ricardo Cardinal Vidal sa iya’ng bahin nipadayag nga dili gyud maayo nga gamiton ang parokya ug altar sa simbahan alang sa proclamation sa mga kandidato kay usa kini ka balaan nga lugar.

Giklaro usab ni Auxiliary Bishop Dennis Villarojo nga maka-excuse ang Bando Osmeña Pundok Kauswagan sa ila’ng gihimo nga proclamation sa San Pedro Calungsod Chapel sa South Road Properties niadto’ng Lunes basin wala maklaro sa grupo nga dili kini pwede.

Matud ni Villarojo nga dili na lang diskutihon ang mao’ng kalihukan tungod kay nahitabo na man ug panghinaut niya nga mapanaminan sa ubang kandidato nga dili na mopahigayon og mga kalihukan sulod sa simbahan gawas sa Santos nga Misa.

Panawagan ni Villarojo nga mas maayo nga dili sila mohimo og mga dayag kaayo nga partisan nga gimbuhaton sulod sa simbahan apan modawat gihapon sila sa mga political parties nga motambong sa Santos nga Misa tungod kay usa kini ka maayo’ng panag-ingnan nga buksan nila sa usa ka Santos nga Misa ang ila’ng kalihukan sa umaabot nga eleksiyon. (BANAT NEWS)