Max Surban magkonsehal

CEBU, Philippines - Niduso og certificate of candidacy kagahapon ang sikat nga Sugbuanong mang-aawit nga si Maximo "Max" Surban ug ang kanhi secretary general sa Bayan Muna Cebu nga si German "Arman" Perez.

Matud ni Surban nga desidido gyud siyang magpapili pagka konsehal sa north district sa dakbayan sa Sugbo.

Dugang pa ni Surban nga bisan pa man wala siya maapil sa line up sa Team Rama si Mayor Michael Rama ug Vice Mayor Edgardo Labella gihapon ang iyang suportahan.

Tug-an pa ni Surban nga  nihangyo si Rama nga dili lang usa siya magpapili pagka konsehal tungod kay nakompleto na ang line up sa team Rama.

Ang mga higala nga abogado ug paryente maoy nipugos kaniya pagpapili pagkakonsehal. Apan siya midugang nga bag-ohay lang siyang gitawgan sa Nacionalista Party nga gi-adopt siya sa partido.

Samtang si Perez buot nga magdala og kausaban sa konseho sa dakbayan sa Sugbo.

Miangkon siya nga giimbitar siya sa Bando Osmeña Pundok Kauswagan (BOPK) ug Team Rama sa ilang partido, apan mas gipili niya nga magpabiling independente. (BANAT NEWS)