Bishop Florencio team moderator na sa Sto. Rosario Parish
CEBU, Philippines - Hingpit na’ng gi-instalar kagahapon sa buntag sa Sto. Rosario Parish ang team of pastor nga gipangulohan ni Auxiliary Bishop Oscar Jaime Florencio isip team moderator. Iya’ng kauban isip mga kaabag sila si Fr. Brendan Señoron, Fr. Cosme dela Peña, Fr. Joseph Stephen Anore ug Fr. Paulin Tuñacao Jr. sa usa ka solemn pontifical high mass nga gisaulog ni Archbishop Emeritus Ricardo J. Cardinal Vidal.
Kini gitambungan nila ni Auxiliary Bishop Dennis Villarojo, Auxiliary Bishop Emilio Bataclan, mga monsignors, kaparian, ginikanan ni Florencio ug kauban niini gikan sa Palo, Leyte ug liboan ka mga layko sa Archdiocese of Cebu.
Sulod sa Santos nga Misa gi-instalar ni Vidal ang modumala sa Sto. Rosario Parish una nipaambit si Florencio sa iya’ng wali ngadto sa nanimba.
Matud ni Florencio nga mapasalamaton siya sa tanang nanimba ug ngadto sa kadagkuan sa Archdiocese nga gipangulohan ni Archbishop Jose Palma kinsa toa karon sa Roma.
Sumala pa ni Florencio nga ang ila’ng tahas kauban ang kaparian sa Sto. Rosario Parish wala’y pulos kung dili moabag kanila ang mga layko nga sakop sa simbahan.
Dugang ni Florencio nga sa iya pa lang pagtan-aw sa mga schedules sa Sto. Rosario Parish, mura siya og mamatay sa kadaghan trabaho pero tungod kay wala man siya mag-inusara, hinungdan nga iya’ng atubangon ug hangpon ang tanang hagit nga moabot sa iya’ng pagdumala isip team moderator.
Gibutyag ni Florencio nga tungod kay dili man niya makaya ang tanang responsibilidad, iya’ng giawhag ang tanang parokyano nga i-ampo sila alang sa ila’ng paglawig sa paglihok sa mga gimbuhaton sa simbahan.
Si Florencio nipasalig sa katawhan sa ila’ng pagtinabangay sa paglihok sa mga responsibilidad.
Nihangyo si Florencio sa iyang kaubanan ug mga sakop nga batonan ang tulo ka C's aron magmabungahon ug malambuon ang ilang pagtrabaho sa simbahan nga naglangkub sa consulting each other, coordinate ug communicate. (BANAT NEWS)
- Latest
