Duha ka polis gidapog, gisumbag

CEBU, Philippines – Usa ka polis ang gidapog sa usa ka babaye sud mismo sa police station samtang laing polis usab ang gisumbag ug gihagit og sumbagay sud gihapon sa ilang presinto diha sa lungsod sa Minglanilla ug sa lungsod sa Oslob.

Nabalhog karon sa karsel si Bodevilla Arañas, 44, taga Sitio Abuno, barangay Tunghaan, Minglanilla human niya gisagpa si PO3 Eduardo Librando sud sa police station.

Si Police Officer 1 Ronelio Salas, desk officer sa Minglanilla Police Station nga nahinabi sa Banat News miingon nga si Arañas miapas sa iyang igsuon nga si Veronica Fernandez nga mireklamo batok sa mga sakop sa Task Force Market diha sa police station tungod sa pagbadlong kanila sa pagpaninda sa karaang merkado nga gipasirad-an na.

Matud pa nga si PO3 Librando nadestino sa maong karaang merkado.

Apan sa pag-apas ni Arañas sa buhatan sa polis gidapog niini si Librando makaduha ka higayon hinungdan nga gikuptan dayon siya sa ubang mga polis ug gibalhog sa karsel. Pasakaan og kasong direct assault si Arañas ugmang adlawa.

Sa laing bahin, gipaslak sa prisohan ang usa ka lalaki nga mireklamo batok sa iyang pag-umangkon human gikatahong nisumbag ug gihagit og sinumbagay ang desk officer sa Oslob Police Station niadtong Huwebes sa gabii.

Ang maong lalaki giila sa kapolisan nga si Benjamin Mendez, 51, taga Poblacion, Oslob samtang ang iyang gisumbag mao si Police Officer 1 Ramon Catubig, nga maoy duty desk officer niadtong higayona.

Matud pa ni PO1 Rolando Buquiran, miabot sa estasyonan ang suspek ug mireklamo batok sa iyang pag-umangkon tungod kay nagmugna kini og kagubot sa ilang pamilya.

Si Buquiran  miingon ilang naabtan si Mendez nga giatiman ni Catubig apan wa kini magtarong  ug arogante kini.

Tungod niini giingnan siya ni Catubig nga ipadayon na lang nila ang pag-blotter sa hitabo kun dili na kini hubog  apan gikatahong nasuko ang suspek.

Gikuha niini ang blotter book ug gipusdak sa lamesa ug dayong sukmag kang Catubig nga wa gyud makalihay.

Gipagawas kini sa presinto apan nanghagit kini og sumbagay maong gidakop siya ug gipaslak sa prisohan ug gikasohan og direct assault. - /EIM) (BANAT NEWS)