‘Shabu Queen

CEBU, Philippines - Nadakpan sa kapolisan ang usa ka babaye ug duha ka armadong lalaki kagahapon sa buntag diha sa Lower Calajoan sa maong lungsod.

Ang nasikop mao si Perlita Caballero nga gianggaan sa mga polis nga “Shabu Queen” sa maong lungsod.

Samtang nakaipsot ang iyang pag-umangkon nga si Leonila nga giingong namaligya usab og drugas.

Apan ang kapuyo niini nga si Carlito Reroma ug si Oliver Caballero nasikop kay naabtan silang nagdulog og armas samtang nangatulog sa balay.

Ang maong operasyon gihimo sa Regional Anti-Illegal Drugs Special Operations Task Group inabagan sa Provincial Intelligence Branch sa Cebu Police Provincial Office.

Si Senior Police Officer 4 Honorato Tano, sa RAIDSOTG7, miingon nga ang operasyon gihimo pinasikad sa search warrants diha sa balay ni Perlita ug Leonila. Apan nakabantay si Leonila hinungdan nga misibat kini apan didto nasikop sila si Reroma ug si Oliver.

Nakuha gikan sa balay ni Perlita ang 15 ka medium packs ug  duha ka gamay nga paketeng gituohang shabu; usa ka KG9 submachine pistol; usa ka box nga puno sa bala sa 9mm; ug heat sealer.   Samtang si Reroma nakuhaan og kalibre .45 nga pistola  ug .357 revolver usab ang nakuha kang Oliver ug tagsa ka medium packs sa gituohan shabu.

Duha ka medium packs ug 11 ka pakete nga shabu ug P380 ang nakuha gikan sa balay ni Leonila. Matud pa sa kapolisan nga ang shabu nga nakuha mokabat og P1,062,000 base sa Dangerous Drugs Board estimate. Si Perlita nga gikuhaan og pamahayag sa media mibalibad ug miingon nga iya na lang abogado maoy iyang patubagon.

Ang duha ka lalaking nadakpan miangkon nga nakuhaan sila og armas apan gihimakak nila nga dunay shabu nga nakuha gikan kanila.

Matud pa ni Tano nga usa ka buwan ang ilang surveillance operation batok sa manag-iyaan ug gihimoan usab nila kini og test buys duha ka higayon.

Dihang nakompirmar nikuha dayon sila og search warrants sa korte.

Si Perlita  gikatahong makabaligya og usa ka kilong shabu matag semana ug anha magkuhaan og supply kaniya si Leonila.

Ang kapuyo ni Perlita matud pa  nakombikto sa paghupot og ginadiling drugas ug atoa na karon sa New Bilibid Prison sa Muntinlupa City. Kini maoy gidudahan sa mga polis nag-supply kang Perlita og shabu. (BANAT NEWS)