Lola napunggit sa motor patay

CEBU, Philippines - Patay ang usa ka 70 anyos nga babaye nga napunggit sa naghaguros nga motorsiklo sa dalan national sa barangay Bawo, lungsod sa Sogod niadtong miaging adlaw.

Si Police Officer 1 Ronald Rondina sa Sogod Police Station miila sa biktima nga mao si Dolores Dotosme, nagpuyo sa maong dapit.

Base sa imbestigasyon ni Police Officer 3 Agustin Bejoc naglakaw ang biktima paingon molabang sa karsada dihang napunggit kini sa naghaguros og padagan sa motor nga si Isidro Demaña Ares, 32, nagpuyo sa Sitio Sto. Niño, Lungsod sa Catmon. Maayong pagkapunggit sa biktima samtang nabun-og usab si Ares ug parehong gidala sa tambalanan apan patay na si Dotosme.

Sa laing aksidente, usa ka 6- anyos nga batang lalaki ang naangol human nabanggaan sa usa ka traysikol sa national highway sa barangay Luray Dos dakbayan sa Toledo.

Ang biktima mao si John Paquite nagpuyo sa maong barangay  ug nagtungha sa South City Central School.

Ang traysikol gimaneho ni Felix Nillas, 54,  taga Luray 1 sa dakbayan sa Toledo.

Gikan sa barangay Poblacion ang traysikol ug paingon na unta sa barangay Sangi dihang kalit nga nilabang ang bata ug nadasmagan kini.

Si Paquite nakaangkon og mga bun-og ug samad sa nagkadaiyang parti sa lawas  ug gidala  sa Toledo City Hospital.

Si Senior Police Officer 3 Lorenzo Mahilom, hepe sa traffic section mipahimangno sa mga ginikanan di pasagdan ilang mga anak nga mag-inusarang molabang sa dalan aron malikay sa disgrasya. (BANAT NEWS)