Gikadena ang kaugalingon

CEBU, Philippines – Naukay kagahapon sa buntag ang mga kawani sa Kapitolyo lakip na ang mga tawo ug mga motorista tungod sa usa ka lalaki kinsa gikadenahan ang kaugalingon diha sa flag pole sa atubangan sa Kapitolyo.

Ang maong lalaki naila nga si Ervin Oliveros, 52-anyos, lumad nga taga lungsod sa Tudela, isla sa Camotes ug giingong ekstrador nga drayber sa taxi. Si Oliveros mihigot og kadena sa iyang hawak ug ang pikas tumoy sa kadena gigaid niya kini ngadto sa flag pole ug gibutangan og padlock nga dunay code numbers.

Una niini, gibadlong kini sa mga gwardiya sa Kapitolyo apan wala mamati hinungdan nga ang mga gwardiya nanawag og polis sa Fuente Police Station.

Apan bisan duna nay mga polis, nagdumili paghatag sa code numbers si Oliveros hinungdan nga giputol na kini sa sakop sa Provincial Disaster Risk Reduction and Management Office (PDRRMO) gamit ang metal cutter. Si Oliveros nagyawyaw kini nga kabubut-on sa “wisdom” ang paggaid niya sa iyang kaugalingon diha sa flag pole. Matud usab niya nga naay “upat ka importanteng mga tawo nga apil sa pito ka haligi nga magpalig-on sa nasud.” Bisan wala hinganli, ang pasumbingay ni Oliveros nagsimbolo og mga personalidad sama sa “magsige og gunit og tabako” (kanhi presidente Fidel Ramos); “ikaduha ang Pambansang Kamao” (Manny Pacquiao); ikatulo “usa ka pari nga nangayo og kausaban sa nasud pinaagi sa oratio imperata” (Bishop Socrates Villegas) ug “mayor sa siyudad nga dunay prutas nga tunokon” (Mayor Rodrigo Duterte). Si Oliveros kinsa taas og bungot nagsul-ob og puti nga polo ug itom nga karsones apan nagtiniil ,gidala sa mga polis apan giingong buhian kini kung walay moduso og reklamo batok kaniya. – /EIM) (BANAT NEWS)