Balay sa kanhi kapitan girakrakan

CEBU, Philippines - Gipaulanan og bala ug nagbilin pa og kartolina nga may gisulat nga hulga ang balay sa kanhi barangay kapitan sa Lugo, sa lungsod sa Borbon, apan armas sa mga suspek ilang nabiyaan dihang aksidente sila nisaliring sa dalan atol sa pag-ikyas.

Duha ka wa mailhing lalaki nga naka-helmet ang matud pa mirakrak sa panimalay ni kanhi kapitan Jennifer Mercader kinsa didto natulog sa balay sa igsuon samtang ang igsuon nga si Lebith Mercader mao ray nahibilin.

Base sa imbestigasyon sa kapolisan, pasado alas-2 sa kaadlawon ang mga silingan sa kanhi kapitan nakadungog og pipila ka buto sa lugar ug may motor nga mipasirit og padagan palayo.

Sa pag-abot sa nagmotor sa kurbadahon nga dalan natumba ang duha maong ang mga residente sa lugar nga wala masayod nga duna kini girakrakang balay daling miduol kanila aron motabang.

Apan nahibulong ang mga tawo kay igo lang namapha ang mga sakay sa motor ug mipasirit usab dayon og padagan, diha sa ilang gikahagbaan nakita ang usa ka kalibre .45 pistola ug gi turnover kini sa mga polis.

Niana nang pagkabuntag nadiskubrehan ni Lebith ang tulo ka slugs sa wa pa matino nga armas ug may paskin nga gibutang sa balay hinungdan nga dali silang mitawag sa kapolisan.

Nasuta sa imbestigasyon nga natusak sa bala ang amakan nga bungbong sa maong balay nga nag-atubang sa national highway.

Matud pa ni Police Officer 1 Ruel Pepito, desk officer sa Borbon Police Station ipaubos nila sa ballistic examination ang armas nga narekober ug itandi sa narekober nga slugs sa atubangan sa balay sa kanhi barangay kapitan. Wa pa matino kun unsay motibo sa maong pagpangrakrak. – /EIM) (BANAT NEWS)