Tulo gipamusil patay

CEBU, Philippines – Patay ang tulo ka lalaki nga nabiktima sa pagpamusil sa tulo ka lugar sa lalawigan sa Sugbo niadtong Domingo.

Patay ang usa ka lalaki nga gituohang gipusil sa usa ka barangay tanod diha sa sitio Adelfa, barangay Lupo sa lungsod sa Barili.

Gideklarar na nga patay sa Barili District Hospital si Randy Estrada, 30, human nakaangkon  og samad pinusilan sa iyang lawas nga gituohang binuhatan ni Ernesto Pasaporte, 60, tanod sa maong barangay.

Si Police Officer 2 Gilbert Encabo, desk officer sa Barili Police Station, nga nahinabi sa Banat News miingon nga nag-inom ang biktima kauban sa upat ka tawo didto sa maong lugar apan kalit lang miabot ang suspek ug nangutana kun siya ba ang ilang gi-estoryahan.

Ang nanag-inom mipasabot sa suspek nga wala silay tawo nga gipasabot sa gi-estoryahan hinungdan nga milakaw si Pasaporte apan misunod ang biktima, sunod na lang nadungog ang buto sa armas.

Sa pagsusi nila sa dapit, ang biktima  nagbuy-od na sa yuta maong  gidala kini sa hospital apan patay na.

Ang suspek mitahan ngadto ni Kagawad Agapito Avancencia.

Samtang naantimano sa iyang ulo ang usa ka Alvin Cambista, 21, kinsa gipusil samtang natulog sa veranda sa ilang balay diha sa barangay Duangan sa lungsod sa Balamban.

Base sa imbestigasyon nga nangatulog sa ilang veranda ang biktima kauban sa iyang manghod ug ig-agaw apan may wa mailhing tawo ang miabot ug mipusil sa ulo niini.

Wa matino sa mga saksi kun kinsa ang mipusil tungod kay nagkaguliyang human sa maong hitabo ug gidala dayon kini sa tambalanan apan wa na kini kinabuhi.

Sa laing bahin, gipusil patay sa wala mailhing mga lalaki ang 34-anyos nga si Jover Rivera taga, Bolinawan, Balamban samtang ang biktima diha sa barangay San Roque sa lungsod sa Asturias.

Base sa imbestigasyon sa kapolisan nga ang biktima kalit lang gipusil sa duha ka armadong lalaki nga sakay og motorsiklo. Gidala sa mga tawo ang biktima sa Asturias Infirmary apan gideklarar kini nga dead on arrival sa doktor. – /EIM) (BANAT NEWS)