Pag-ilis sa treasurer sa Talisay tukion sa konseho

CEBU, Philippines – Tukion karong adlawa sa konseho sa dakbayan sa Talisay ang draft resolution ni Mayor Johnny De los Reyes nga nagtudlo ni Anunciacion Ante kinsa assistant city treasurer nga makapirma sa mga tseke ug transaksyon sa City Treasurer’s Office ug dili na si Emma Macuto nga iya’ng girelibuhan.

Ang resolusyon ni JVR gihatud niadto’ng Biyernes sa hapon sa buhatan ni Konsehal Edward Alesna, chairman sa committees on budget and appropriations ug ways and means.

Si Macuto nagmagahi sa pagbiya sa puwesto hangtud ang iya’ng mga labaw sa Bureau of Local Government Finance ang momando kaniya.

Gani niadto’ng Biyernes, si Macuto namirma na sa mga tseke sa iya’ng buhatan ug nipahibawo nga dili niya tumanon ang mando sa mayor tungod kay dili siya ubos sa kamanduan sa mayor.

Matud ni Macuto nga mag-agad usab siya sa desisyon sa iya’ng mga abogado kun unsa’y sunod nila’ng lakang ilabi na ang pagpasaka’g kaso batok sa mayor sa gihimo niini’ng pagbalhin sa pwesto samtang iya usab kini’ng ikonsulta sa iya’ng pamilya.

Ang abogado ni Macuto nipadala na usab og suwat sa buhatan sa Mayor nga ipabakwi ang memorandum ngadto kang Macuto sa sama’ng rason nga wala’y gahum ang mayor sa paghimo niini.

Si Konsehal Edward Alesna niingon nga nahibawo siya nga ang pagtudlo ug paghulip sa usa ka city treasurer wala sa gahum sa mayor hinuon mahimo kini’ng mohangyo sa BLGF nga pahulipan.

Gibutyag ni Macuto nga sigun sa iya’ng pakisusi sa iya’ng labaw nga si Herminigilda Garsula nga wala gyu’y suwat ang mayor nga gipadala ngadto sa ila’ng buhatan nga naghangyo sa paghulip kaniya.

Matud sa mayor nga ang iyang kamanduan pagbalhin ni Macuto sa merkado sa Tabunook usa ka internal nga kamanduan diha lang sa City Hall. – /GMR) (BANAT NEWS)