Cancer sa suso matambalan

CEBU, Philippines – Ang breast cancer mao’y nag-una nga cancer sa Metro Cebu niadto’ng tuig 2011-2012 diin ubay-ubay na ang namatay.

Apan ang mao’ng sakit pwede’ng matambalan kung ang nataptan magpahiling dayun sa doktor.

Si Ronald de los Reyes, program coordinator sa Aboitiz Cancer Center, nibutyag nga moabot ngadto sa 353 matag tuig ang bag-ong kaso sa breast cancer diin ang 46.39 porsiyento niini o 164 naggikan sa dakbayan sa Sugbo.

Base sa ila’ng talaan, moabot ngadto sa 117 ang mamatay matag tuig tungod sa breast cancer.

Sa upat ka bag-ong ma-diagnose nga aduna’y breast cancer matag tuig, usa niini ang mamatay.

Si Dr. Nice Kanico, general surgeon nga specialist sa breast, nagkanayon nga kung adunay mga mabantayan nga bugon sa suso dapit sa ilok kinahanglan nga mopaubos dayun og mammography screening.

Gipasabot ni Kanico nga ang cancer hereditary usab kini o sa kaliwat apan adunay hormonal factor.

Sa hormonal factor, kadto’ng dugay nga namabdos ug wala gyud magmabdos, sayo nga nadalaga o nagregla ug kadto’ng dugay nga nag-menopause, delikado kini nga makabaton og breast cancer.

Ang usa ka babaye kung gitunghaan sa regla nga wala pa’y 12-anyos ug kadto’ng nag-menopause pataas ngadto sa 54-anyos delikado sa breast cancer.

Ang babaye nga nagpaubos sa hormonal replacement therapy kung nag-menopause na ug ang mga dagku og lawas o obesity delikado usab sila sa breast cancer. Matud ni Kanico nga ang mao’ng sakit matambalan kung ang pasyente magpahiling dayun sa doktor kung adunay mabantayan sa iya’ng lawas ilabi na kadto’ng nakabaton og bugon sa suso o ba kaha hubag nga bisan unsaon og inom og antibiotic dili gyud mo-response sa tambal. – /GMR) (BANAT NEWS)