Komitiba moatiman sa mga district hospitals
CEBU, Philippines – Giumol ni Gobernador Hilario Davide III ang Hospital System Development Committee (HSDC) aron pag-atiman sa serbisyo sa mga tambalanan sa probinsiya.
Ang HSDC usa ka independent committee nga maghatag og support services ngadto sa provincial ug district hospitals.
Ila’ng tahas ang pagdeterminar sa mga gipanginahanglan sa mga tambalanan aron maseguro ang epektibo nga serbisyo.
Kini gipangulohan ni General Services Officer Jone Siegfred Sepe ug mga doktor isip iya’ng mga sakop.
Si Grace Autor mao’y in-charge sa medicines ug supplies ug siya usab ang reponsable sa planning, warehousing ug logistics sa mga tambal ug supplies.
Si Joelynn Marie Baratao ug Engr. Edwin Zamora mao’y mag-handle sa infrastructure lakip sa tahas ni Baratao ang facilities ug laboratory equipment.
Si Raymund Jade Laug-laug ug Sarah Kaye Pogoy gitahasan sa coordination, process improvement ug monitoring sa medical assistance programs ilabi na sa Point of Care enrollment, No Balance Billing claims, MAP Capital Fund ug Aid in Individual in Crisis.
Si Helena Soletario, Aimee Galinato ug Marilette Manuel mao’y magdumala sa human resource ug administrative matters. Sila usab ang responsable sa pag-hire ug pag-recruit og manpower.
Ang HSDC adto mo-report sa buhatan sa Provincial Administrator.
Ang mga personnel sa committee mao’y manubag kung adunay mga kalapasan nga mahitabo nga maglambigit sa serbisyo sa panglawas.
Ang HSDC gitahasan usab sa pag-establisar og distribution network alang sa availability sa mga importante nga mga tambal ug medical supplies sa mga tambalanan sa probinsiya pinaagi sa Cebu Medicine Consignment System.
Ang Eexecutive Order 12 nga nag-umol sa HSDC magseguro nga ang mga katawhan sa probinsiya maka-avail sa PhilHealth benefits ug claims. – /GMR) (BANAT NEWS)
- Latest
