7th district sa Sugbo may problema pa

CEBU, Philippines – Hayan nga wala’y mga kandidato nga makalansar sa mga elective positions sa bag-ong naumol nga ika-pito nga distrito sa Sugbo karong eleksyon sa sunod tuig.

Kini tungod kay hangtud karon wala pa ikapublikar sa mantalaan ang balaod nga gipirmahan ni Presidente Aquino nga nagmugna sa bag-ong distrito sa Sugbo nga pagatawgon na og “7th congressional district.”

Ang ikapito nga distrito gilangkoban sa walo ka lungsod nga mao ang Dumanjug, Ronda, Alcantara, Moalboal, Badian, Alegria, Malabuyoc ug Ginatilan. Ang mao nga mga lungsod giiban gikan sa lapad unta kaayo nga ikaduha nga distrito.

Ang Commission on Elections (Comelec) mitakda na karong Oktubre 12 ngadto sa 16 sa pagdawat sa mga certificates of candidacy sa mga gusto’ng magpapili sa lainlaing elective positions.

Matud ni Cebu Provincial Election Officer Ferdinand Gujilde nga posible nga dili maapil ang 7th district nga madaganan og mga kandidato sama sa usa ka kongresista ug duha ka sakop sa Provincial Boards. Giawhag ni Gujilde si 2nd District Congressman Wilfredo Caminero nga paspasan ang pag-lobby niya ngadto sa Comelec En-Banc alang sa pagpahigayon sa tukma nga mga gimbuhaton.

Gipasabot ni Gujilde nga kinahanglan gayud nga mahan-ay na ang status sa 7th district aron malakip kini og patik sa balota ingon man sa ubang papeles nga gamiton atol sa eleksyon sunod tuig. – /RUB) (BANAT NEWS)