Gipusil sa mga amigo

CEBU, Philippines – Giunay ang usa ka lalaki og pusil sa iyang mga higala samtang nagsakay kini og motorsiklo diha sa sitio Cabotoy, barangay Poblacion, dakbayan sa Talisay.

Nakaangkon og samad pinusilan sa nagkadaiyang parti sa iyang lawas si Jake Rabaya, 22, taga barangay Tisa, Cebu City. Samtang ang nagpusil kaniya mao ang iyang amigo nga si John Taboada ug laing barkada nga wa pa ilhi. Sa imbestigasyon sa kapulisan nasuta nga padung sa lungsod sa Minglanilla ang tulo sakay sa motorsiklo apan pag-abot nila sa maong lugar kalit nga gipusil ang biktima ug pagkahuman gihagbong kini sa motorsiklo ug gibiyaan.

Gitabang ang biktima ug gidala sa Talisay City District Hospital ug gibalhin sa Vicente Sotto Memorial Medical Center. Matud pa sa kapulisan nga lisod pa nila maestorya ang biktima tungod sa nahiaguman niini. Sa ilang pag-abot sa crime scene tulo ka mga kabhang sa .45 ang ilang nakuha.

Sa laing bahin, nalandig sa tambalanan ang hepe sa mga tanod sa barangay Linao dakbayan sa Talisay human gidunggab sa lalaking nag-wild sa sitio San Miguel. Samdan sa iyang buko-buko ug tiyan si Dominador Poncardas, 69, human siya dunggaba ni Mark Kevin Echavez, 27 anyos.

Matud pa nga armado og kutsilyo si Echavez niadtong tungora ug kalit lang nga nag-wild maong niresponde ang biktima ug mga kaubanan.

Sumala pa nga gialam-alaman ni Poncardas  ang suspetsado apan kalit siya niining gidunggab upat ka higayon ug pagkahuman niikyas ang suspek. Gidala sa Vicente Sotto Memorial Medical Center ang biktima samtang nadakpan ang suspek sa hot pursuit operation sa kapolisan ug nakuha kaniya ang kutsilyong iyang gigamit sa krimen. – /EIM) (BANAT NEWS)