Mando ni JVR wa tumana sa city treasurer

CEBU, Philippines - Nagmagahi si Talisay City Treasurer Emma Macuto sa pagtuman sa kamanduan ni Mayor Johnny V. de los Reyes sa pagpabalhin kaniya sa merkado sa Tabunok. Kini human ang Bureau of Local Government Finance niingon nga wala’y katungod ang mayor sa paghulip kaniya kay siya ubos man sa Department of Finance.

Matud ni Macuto nga siya ang makwestiyon sa iya’ng labaw kun palabihon niya ang kamanduan sa mayor. Hinuon giangkon ni Macuto nga dili siya komportable sa sitwasyon nga wala na’y salig kaniya si JVR apan wala siya’y mahimo kun dili ang pagsunod sa mando sa iya’ng labaw ug dili sa mayor.

Si JVR sa iya’ng bahin niingon nga wala niya gipalagpot si Macuto apan iya lang kini’ng gihulipan samtang nagpadayun ang imbestigasyon sa Commission on Audit.

Apan giklaro ni Macuto nga wala’y imbestigasyon nga nahitabo kaniya ug wala usab siya’y anomaliya.

Samtang sa ikaduha’ng higayun karong tuiga gibalhin ang anak ni Macuto nga si Hazel Bathan ug kagahapon gibalhin sa City Planning and Development Office gikan sa Human Resource Division ug Cooperative Office.

Si Bathan nagdumili na lang sa pagkomentaryo apan ang panghitabo niya ug sa iya’ng inahan iya’ng gihulagway nga usa ka matang sa pamolitika. Sa laing bahin, gimando na usab ni de los Reyes ang pag-iban sa kota sa mga job order sa mga konsehal ug bise mayor.

Kagahapon si de los Reyes nipagawas og suwat ngadto ni Bise Mayor Romeo Villarante ug mga konsehal nga gikan sa lima ngadto na lang sa duha ka job orders. Ang kamanduan gibase sa pamahayag ni Villarante nga nag-awhag sa mayor nga dili na mokuha og sobra sa JO aron dili mabangkaruta ang panudlanan sa gobiyerno.

"Kung mao na ila’ng gusto hala, pwede ra man gani og wala aron sila mao’y mapasanginlan kung ngano’ng hugaw ang Talisay," matud ni JVR. Si Villarante nisaway sa lakang sa mayor ug niingon nga gamiton na sab ni de los Reyes ang iya’ng lihok aron dauton ang konseho ug mao’y pasanginlan sa tanang kaguliyang sa Talisay. (Gabriel C. Bonjoc/GMR)(BANAT NEWS)