Alayon sa Minglanilla lig-on gihapon—Peña

CEBU, Philippines - Pabiling lig-on ang Alayon Party diha sa lungsod sa Minglanilla sumala pa ni Mayor Elanito Peña aron pagsalikway sa mga gipakatap nga estoryang nabungkag na ang ilang mga sakop diha sa konseho ug mga kapitan.

Matud pa ni Peña, mugna-mugna kini sa mga kaatbang nila sa politika ug way kapasikaran. Ang Alayon Party gipangulohan ni Kong. Gerald Anthony Gullas.

Sumala pa ni Peña nga sa 19 ka barangay sa Minglanilla, 13 ka kapitan ang mipadayag sa ilang suporta kaniya samtang unom lang ang atoa sa pikas grupo.

Si Mayor Peña magpasubli pagkamayor kuyog  gihapon ni Bise Mayor Jojo Selma nga magpasubli sab sa maong posisyon.

Kuyog gihapon nila ang upat ka incumbent nga konsehales nga magpasubli mao sila Jong Adlawan; Roy Nacario; Jerry Canares ug si Jimmy Gumeran samtang ang bag-o nilang mga kauban mao sila si Retired Police Chief Supt. Alexander Abadinas; Frus Laput, prinsipal sa University of Visayas; Dodong Guituavan, barangay kapitan sa Tunghaan ug ang barangay kapitan sa Tungkop, Edwin Quiapo.

Gipaabot nga tulo ka mga kandidato ang mag-ilog sa pagkamayor sa lungsod human gikatahong mobalik pagdagan si Marlo Canada ug ang bag- o nga si Alex Canares nga usa ka magpapatigayon. (Gabriel Bonjoc/EIM)(BANAT NEWS)