35 balay ugdaw kay dunay ‘nanuyop’
CEBU, Philippines - Miabot sa 35 ka mga balay ang naugdaw ug duha ang partially damage sa sunog sa sitio Cadahoan, barangay Talamban ning dakbayan sa Sugbo , kagahapon sa hapon.
Matud pa ni Fire Officer 3 Novo Erana, imbestigador sa Talamban Fire Station nga nahinabi sa Banat News alas 4:10 nila nadawat ang alarma sa sunog ug pagka alas 4:20 nila nakontrol.
Sumala pa ni Erana nga nagsugod ang sunog sa balay ni Richard Hermoso.
Gisusi karon sa kabomberohan ang report sa mga tawo nga giingong adunay nanuyop og shabu sa balay ni Hermoso niadtong higayona nga maoy hinungdan sa sunog.
Kadaghanan sa kabalayan ginama sa light materials maong dali kaayo nga mikatap ug naproblema usab ang kabomberohan kay gamay ang dalan sa lugar ug lisod sudlon sa mga fire trucks.
Atol sa sunog usa ka 60 anyos nga lola nga si Erlinda Himaya ang nakaangkon og mga paso sa lawas human naabtan sa kalayo, ang biktima gidala sa tambalanan.
Si Erana miingon nga moabot sa P200 mil ang danyos sa maong sunog. Gipangita na karon sa kapolisan si Hermoso aron patubagon sa pasangil sa iyang mga silingan. (Jojo C. Ugdol/EIM)(BANAT NEWS)
- Latest
