Pito nadakpan sa drugas

CEBU, Philippines - Mokabat sa P318, 000 nga kantidad sa shabu ang nasakmit sa kapolisan gikan sa duha ka suspetsadong pusher nga ilang nadakpan sa dalan Juan Luna Extension, barangay Poblacion, dakbayan sa Danao.

Si Police Officer 3 Nelson Pantoja  sa Danao City Police Station miila sa nadakpan mao sila si Emmanuel Buot alyas  Boss, 46, ug kauban niini nga babaye nga si Leonelyn Cocal, 30.

Ang mga sakop sa City Anti-Illegal Drug Special Operations Task Force (CAIDSOTF) gipangulohan ni Police Officer 3 Fiel Restauro nihimo og buy-bust operation batok kang Buot ug napalitan kini og usa ka paketeng shabu maong ilang gidakop.

Sa pagrekisa kaniya, nakuha ang dugang tulo ka gagmay’ng pakete ug usa ka medium size pack nga shabu, P1,000 nga halin sa drugas.

Samtang si Cocal nga diha sa maong lugar nakuhaan usab og duha ka paketeng shabu.

Sa laing operasyon, nadakpan sa mga sakop sa City Intelligence Branch (CIB) sa Cebu City Police Office sud sa usa ka drug den diha sa Villagonzalo 2, barangay Tejero ning dakbayan sa Sugbo ang lima ka tawo.

Ang deputy chief sa CIB, Insp. Gomersendo Mandawe miingon nga sakyanan pangpasaheroan na lang ang kulang sa ilang nadakpan kay apil sa ilang nasikop anaay drayber, konduktor ug dispatser.

Giila ang mga nasikop nga sila si Jaime Rodriquez, 52, kinsa  maoy target sa kapulisan  ug ang laing upat nga giingong nanuyop nga sila si Marvin Polloso, 38, taxi driver; Avenser Pagobo, konduktor sa Ceres bus; Marcus Cabucos, 41, dispatser sa Rough Riders Bus, ug Frederick Saraña Go, 37.

Gamit ang usa ka libo ka pesos nga buy- bust money nakapalit og usa ka putos sa gituohang shabu ang asset sa kapulisan ug dihang napositibo gironda dayon ang balay ni Rodriquez, diin usab nasakpan ang upat.

Narekober sa taga CIB ang 50 ka gagmay nga pakete ug usa ka medium size nga gituohang shabu nga mikantidad og P59,000. Ang tanang mga nadakpan gikatakdang pasakaan og kasong paglapas sa Akta Republika  9165.  (BANAT NEWS)