Lola sikop sa pagpangilad

CEBU, Philippines - Gitanggong na sa prisohan sa Balamban Police Station ang 64-anyos nga lola human giingong nag-atubang og kaso sa pagpangilad sa lungsod.

Ang gidakop mao si Erlinda Abell Tiu, nagpuyo sa sitio Alang-Alang, Buanoy, Balamban apan lumad nga taga barangay Ticad, Bantayan.

Matud ni PO3 George Realista Jr. sa Balamban Police Station nga adunay upat ka warrant of arrest sa kaso’ng pagpangilad ang ila’ng naukayan batok sa mao’ng lola.

Apan niini’ng uwahi giingong nakapangilad ang suspek sa usa ka negosyante sa lungsod sa Balamban.

Giingong modus sa suspek ang pagpangutang unya mo-isyu og bouncing check.

Lakip sa nabiktima sa suspek ang usa ka tindahan nga namaligya og lawog sa hayupan. (Raymond D. Abarcas/GMR)

Prime mover nabangga, tulo angol

Grabeng naangol ang tulo ka tawo diha’ng nabangga sa pangpang ang prime mover nga nagguyod og 40-footer van nga ila’ng giluwanan sa sitio Canpatoc, Bungon, lungsod sa Tabogon alas 2 pasado sa niagi’ng Miyerkules sa kadlawon.

Si Senior Police Officer 4 Carlos Canseco sa Tabuelan Police Station niila sa mga biktima nga sila si John Vicmar Cabando, hingkod, taga Isla sa Olango, dakbayan sa Lapu-Lapu, nga mao’y drayber sa prime mover.

Dugang grabe’ng naangol mao ang duha ka pahenante nga sila si Johnmar Mercader, 29, taga Careta, dakbayan sa Sugbo ug Raul Cotera, 47, taga Poblacion, Cordova.

Matud ni Canseco nga ang 40-footer van gikargahan og solar panel diha’ng kalit lang nawad-an og brake sa dulhugon nga bahin sa mao’ng lugar.

Gimaneho ni Cabando ang paggangi na lang sa manobela hinungdan sa pagkabangga ngadto sa pangpang.

Gumikan sa kusog nga impact sa pagbangga, ang tulo ka biktima nga naglakip sa drayber ang napiit sa ulohang bahin ug ang mga polis ug sakop sa kabomberohan sa mao’ng lungsod ang nagtinabangay sa pagtangtang kanila sa ila’ng nahimutangan.

Si Canseco niingon nga ang mga biktima una’ng gidala sa Tuburan District Hospital apan tungod sa grabe nila’ng kahimtang dali sila’ng gibalhin sa Vicente Sotto Memorial Medical Center sa dakbayan sa Sugbo. (BANAT NEWS)