Duha nag-motor gipamusil
CEBU, Philippines - Naangol ang duha ka tawo nga nagsakay og motorsiklo diha’ng gipamusil sa duha ka lalaki nga nagsakay usab og motorsiklo sa sitio Lourdes, Poblacion, lungsod sa Liloan alas 8 pasado sa niagi’ng Martes sa gabii.
Si Police Officer 3 Jesson Gayo sa Liloan Police Station niila sa mga biktima nga sila si Jameson Ruado, 30 ug Philip Ernane Morie Jr., 16, taga barangay Cogon sa mao’ng lungsod.
Matud ni Gayo nga nagdagan padulong pauli sa ila’ng panimalay ang mga biktima diha’ng ang duha ka wala hiilhi’ng lalaki nga nagsakay og motorsiklo kalit lang ni-overtake ug ang backrider ang namusil ngadto kanila sa makadaghang higayun.
Ang mga biktima nga nakahimo pa sa pagpadagan sa motorsiklo hangtud sa ila’ng panimalay ang nakaangkon gyud og mga samad pinusilan sa ila’ng paa ug uban pa’ng bahin sa kalawasan.
Dali nga gihatud ang mga biktima sa Vicente Sotto Memorial Medical Center. (BANAT NEWS)
- Latest
