Moratorium sa demolisyon suportado

CEBU, Philippines - Suportado sa mga partylist groups ang giduso nga ordinansahon ni Konsehal Alvin Dizon sa pagpatuman og  moratorium sa pagpangguba sa kabalayan sa mga luna sa dakbayan sa Sugbo ug ipaseguro ang kabalhinan ug konsultahon una sa dili pa ang demolisyon.

Gisugyot sa pangulo sa Sanlakas, Floroco Enricoso, nga ipaklaro ang papel sa Local Housing Board (LHB) ang ila’ng papel kalabot sa clearing operation sa dakbayan sa Sugbo. Buot nila nga seguraduhon sa LHB ang kabalhinan sa dili pa ipahigayon ang demolisyon.

Kini nunot sa duha ka sunod-sunod nga demolisyon sa dakbayan sa Sugbo sama sa may dalan Maria Christina, Capitol Site ug sa Doña Pepang Cemetery, sa Tejero.

Si Dizon kinsa chairman sa committee on housing sa konseho nisugyot sa temporaryo nga pagpahunong sa demolisyon kung wala pa’y klaro nga kabalhinan ang mga apektado nga pamilya.

Kini tungod sa pakyas nga paghatag og kabalhinan sa mga apektado ug wala usab mahisubay sa Republic Act 7279 kun ang Urban Development and Housing Act.

Samtang si Emalyn Aliviano, tigpamaba sa Kilusan para sa Pambansang Demokrasya-Cebu (KILUSAN-Cebu), niingon nga  suportado nila ang ordinansa tungod kay usa ka aktibo nga depensa sa mga pobre.

Dugang pa ni Aliviano nga ang mao’ng ordinansa dili lang para sa pagprotektar sa mga pobre apil na niini ang paghatag og oras sa kagamhanan sa dakbayan ilabi na ang mga responsibilidad sa demolisyon ug sa mga hingtungdan nga mohatag og relokasyon.

Nanghinaut ang duha ka partylist groups nga hapsay nga ma-aprobahan ang ordinansahon. (BANAT NEWS)