TF Montebon wa pay ebidensya vs kapuyo

CEBU, Philippines - Hangtud karon padayon pa nga nanguha ang Special Investigation Task Group (STIG) og mga ebidensya nga makatumbok kang Jennalyn Soon ang kapuyo ni Ruben Fernandez nga may kalambigitan kini sa pagpatay kang Karen Kaye Montebon.

Kagahapon sa buntag, subling mihimo og case conference ang SITG nga maoy nagkupot sa kaso ni Montebon, ang 17-anyos nga dalaga gipatay sulod sa ilang panimalay didto sa dakbayan sa Lapu-Lapu.

Matud ni Senior Superintendent Armando Radoc, SITG Commander daghan nanggawas nga mga negatibong komento labot kaniya gumikan sa wala nila pagsang-at og kaso batok kang Jennalyn.

Una niini, gihulagway sa kadaghanan nga angayang pasakaan og kaso ang kapuyo ni Fernandez kay posibleng kakunsabo kini ni Fernandez.

Giklaro ni Sr. Supt. Radoc, si Jennalyn wala nila hingpit nga gi-clear sa kaso apan hangtud nga way ebidensya o testigo nga magtumbok nga duna kini kalambigitan sa pagpatay dili nila mahimong kasohan ang inosente.

Matud pa ni Radoc dili nila gustong dali-dalion ang pagsang-at og kaso tungod lang sa pressure.

Hangtud karon nagpaabot pa ang SITG sa resulta sa gihimong forensic examination sa patay’ng lawas ni Montebon  gikan sa PNP Crime Laboratory nga gituohan nilang makatabang pagtan-aw kun si Jennalyn apil sa mihimo sa krimen. ‘’Pareha anang hairstrands nga na-recover didto sa balay, kadtong sa kuko basin naka-kamras ‘to (biktima). Those are parts of the forensic which is not yet covered,” matud ni Radoc. (BANAT NEWS)