Paso na ang lisensya

CEBU, Philippines - Nipaso na ang lisensya sa manufacturer sa mga pabuto nga aksidenteng nakapatay og bata diha sa barangay San Miguel lungsod sa Cordova, sumala pa sa Police Regional Office-7.

Gibutyag ni Senior Police Officer 2 Glen Facturan sa Firearms and Explosives Office sa PRO-7 expired na ang lisensya sa manufacturer nga si Juliet Wahing niadto pang Enero 2014.

Si Facturan mipasabot nga kung wala’y lisensya ang usa ka tawo, dili kini pwede nga mohimo og mga pabuto o mopahigayon og mga fireworks display.

Sumala pa ni Facturan nga nakapakita si Wahing og mayor’s permit sa pag-renew niini sa iyang business permit apan sa pag-aprubar sa pagbuto o “fireworks display” kinahanglan og pagtugot gikan sa FEO Kampo Crame.

Kini miingon nga ang proseso niini, ang city police director kinahanglan nga maoy moendorsar sa pag-renew sa lisensya sa firecracker/pyrotechnic manufactures nganha sa ilang buhatan sa FEO-7 ug sila maoy mopasa niini ngadto sa kaulohan.

Apan sa kaso ni Wahing wala’y nadawat nga record ang FEO-7 nga nag-apply kini og permit.

Sa maong kalambuan gitug-an ni Facturan nga nakadawat na sila og direktiba nga imbitahon si Wahing alang sa imbestigasyon.

Si Facturan nagkanayon nga dako ang posibilidad nga dili na maaprobahan pa si Wahing kun karon pa kini mo-renew sa lisensya tungod sa maong aksidente.

Ang hepe sa kapulisan sa Cordova, Sr. Insp. Alexander Nuñez miingon nga sa inisyal nila nga nakuha nga impormasyon duna na’y panagsabot-sabot si Wahing ug ang pamilya sa bata nga di na ihinayon ang kaso.

Apan kini miingon nga magpaabot pa sila sa reglamentary period una nila buhian sila si Jason Toquib ug Joseph Berdin nga maoy nagdagkot sa maong mga pabuto. (BANAT NEWS)