Labaw sa P500M alang sa 93-1

CEBU, Philippines – Labaw sa P500 milyones ang nasabutan tali sa Kapitolyo ug Cebu City Hall labot sa bayad sa mga luna nga ubos sa Provincial Ordinance 93-1. Kini atol sa tigum sa Technical Working Group diin gihan-ay ang mga kondisyon sa Memorandum of Agreement (MOA).

Wala hinuon nibutyag si Bise Gobernador Agnes Magpale kung pila ang kantidad nga nasabutan tali sa probinsiya ug dakbayan.

Apan matud niya nga ang nasabutan mas labaw sa gitanyag sa dakbayan sa Sugbo nga P500 milyones.

Sayo niini ang Kapitolyo nihangyo sa kagamhanan sa dakbayan sa Sugbo nga dugangan ang P500 milyones og luna nga balor og P1.3 bilyones tukma sa market value sa mga luna sa 93-1 nga mobalor og P1.8 bilyones.

Matud ni Magpale nga kung mahuman na ang MOA ipresentar nila kini sa konseho sa dakbayan ug sa hunta probinsiyal.

Dugang ni Magpale nga ang nitambong sa tigum niadto’ng nilabay’ng adlaw sa habig sa dakbayan mao si Mayor Michael Rama ug Bise Mayor Edgardo Labella ug abogado sa dakbayan.

Sa habig sa probinsiya mao si Gobernador Hilario Davide III ug abogado sa Kapitolyo. – /GMR) (BANAT NEWS)