Dengue sa siyudad alarming na

CEBU, Philippines – Gihulagway ni Cebu City Health Officer, Dr. Daisy Villa, nga alarming na ang nagkadaghan ug nagsaka nga kaso sa dengue nga nikalas og kinabuhi.

Gumikan niini, nipahigayun sila kagahapon og mist spraying ug blower sa mga dapit diin adunay natala nga may namatay sa dengue nga ila’ng gisugdan alas 6 sa buntag.

Sa health center sa barangay Guadalupe, naabtan sa Banat News si Villa nga nanghinabi sa mga heath ug barangay workers alang sa pagpahigayun og misting sa pipila ka dapit ilabi na sa sitio Sambag 2 diin dunay namatay nga 4-anyos nga bata’ng babaye.

Matud ni Villa nga sa wala pa gihimo ang misting, ilaha’ng giawhag ang mga barangay nga manglimpyo apan nasagmuyo sila human iya’ng nakita nga daghan gihapon sa mga tawo ang wala’y pagpakabana.

Gibutyag ni Villa nga duna sila’y gipagawas nga pamaagi nga gitawag og 5-S.

“There are 5-S, una is search and destroy so ato’ng giawhag atong katawhan nga naa tay 4’oclock habit, ikaduha we have to seek early consultation and treatment, third there should be a self protection, ika-upat say no to indiscriminate fogging dili magpataka og paaso, the last is the social mobilization, meaning to say kita’ng tanan magkausa to combat the dengue,” matud ni Villa.

Niadto usab ang grupo sa sitio Sambag 2 diin namatay ang 4-anyos nga bata’ng babaye niadto’ng Septiyembre 9 tungod sa sakit.

Samtang nagpadayun ang misting, niduol kang Villa si Denyvive Conchas, 25, ang inahan sa bata nga namatay nga emosyonal sanglit wala siya nagdahum nga mao’y dangatan sa iya’ng anak.

Ang hitabo nakapabalaka usab sa ubang ginikanan ilabi na sa may mga anak nga gihilantan.

Samtang nihatag og P4.9 milyones ang Cebu City Disaster Risk Reduction Management Office ngadto sa City Health Department isip ayuda sa gideklarar nga gubat batok sa dengue.

Matud ni Konsehal Dave Tumulak, pangulo sa CCDRRMO, nga ang naasoy’ng salapi ipamalit kini og mga kahimanan sa pagsanta sa dengue sama sa protective suit ug mga chemicals sa pagpatay sa mga lamok.

Samtang gipahibawo ni barangay Pasil Kapitan Julius Guio-Guio nga mohatag sila og ayuda sa pamilya sa duha nga bag-o lang namatay tungod sa dengue.

Sukad sa Enero hangtud niini’ng buwana pito na ka bata ang nakalas sa dengue itandi sa upat ka namatay sa susama’ng mga buwan sa nakalabay’ng tuig.

Sa barangay Apas, ang BHWs nangunay pagbutang og toxin o chemical ngadto sa kurtina sa sitio Baca ug San Miguel diin may unom ka kaso sa dengue sulod lang sa una’ng duha ka semana sa Septiyembre.

Si Mayor Michael Rama buot makigtagbo sa kadagkuan sa Cebu City Medical Center (CCMC), CHD, Nutrition Scholars ug Association of Barangay Councils aron tukion ang problema sa dengue. – Rowena D. Capistrano ug Sheriza Mae R. Uy/GMR) (BANAT NEWS)