P.7M shabu nasakmit

CEBU, Philippines – Kapin sa P700 mil nga kantidad sa drugas ang nasakmit sa kapolisan sa managlahing operasyon nga gilusad sa kapolisan sa probinsya sa Sugbo.

Sa barangay Tuburan sa dakbayan sa Danao, nadakpan ang upat ka mga lalaki nga sila si John Rey Gonzales, Rey Paring, Iven John Cuenco ug Jean Gonzales.

Ang ilang target mao si John Rey  nga ilang napalitan og P300 nga shabu ug human natunol ang drugas gidakop kini dayon.

Apil sa nasikop ang laing tulo nga gituohang mga kauban niini. Nakuha sa kapolisan ang usa ka dakong putos, tulo ka medium size nga pulos adunay sud nga gituohang shabu ug mga drug paraphernalia.

Nikabat sa P450,878.000 ang kantidad sa mga drugas ang nasakmit sa kapulisan.

Sa laing bahin, tulo ka mga lalaki ug usa ka babaye ang nasikop sa kapulisan sa gipahigayon nga buy- bust operation diha sa barangay Luray Dos sa siyudad sa Toledo.

Giila ang mga dinakpan nga sila si Richard Dacoyan ,32, ug ang mga ig-agaw niini nga sila  si Gilbert Dacoyan ug Junrix Dacoyan ug ang usa ka Deborah Navarro.

Matud sa kapulisan nga naaktuhan ang mga suspek nga nanuyop sa nahisgutang lugar dihang gipalitan og drugas si Richard sa poseur buyer nga nagkantidad og P200.

Nakuha gikan sa grupo ang upat ka gagmay nga putos ug lima ka dagkong paketeng gituohang shabu ug P200 nga buy-bust money.

Gibanabana nga anaa sa 30 gramos ang timbang sa nasakmit nga drugas ug mobalor  kini og kapin P300 mil.

Sa lungsod sa Compostela, nadakpan ang gipasanginlang drug pusher sa barangay Bagalnga nga si Recto Taroja,27, sa usa ka buy-bust operation ug nasakmit gikan kaniya ang unom ka gagmay’ng paketeng shabu.

Ang mga dinakpan mag-atubang og kasong paglapas sa Republic Act 9165.  – Raymond Abarcas ug Romeo T. Limpangog/EIM) (BANAT NEWS)