CPPO gipasidunggan

CEBU, Philippines – Usa ka dakung pasidungog ang nadawat sa Cebu Provincial Police Office human sila giila nga labing maayo nga buhatan sa probinsya sa kapulisan sa pakigbatok sa ilegal nga drugas.

Gikan sa Hulyo 2014 hangtud Hulyo 2015 miabot na sa 69 milyones pesos nga kantidad sa shabu ang nasakmit sa CPPO.

Ang direktor sa kapulisan sa CPPO, Sr. Supt. Noel Gillamac mapasigarbohon nga mipakita sa Plaque of Recognition nga ilang nadawat gikan mismo ni PNP Chief Police Director General Ricardo Marquez nga gihatag niadtong nakalabay nga Miyerkules.

Sa maong pasidungog giila ang CPPO nga maoy pinakamaayo nga buhatan nga mipakita og labok sa gubat batok drugas isip “The Best Performing Provincial Anti-Illegal Drugs Special Operations Task Group” dinhi sa nasud.

Ang maong pasidungog gihatag sa CPPO human sa makuting pagsubay sa nahimong record sa operasyon sa matag buhatan sa kapulisan sa probinsya.

Sa kinatibuk-an ang CPPO mihimo og 1, 120 ka mga drug raid operations nga naglakip sa 525 ka buy-bust operation, 152 ka pagpatuman sa search warrants, 364 ka mga saturation drive, 8 ka operation sa pagpangibot og marijuana nga miresulta sa pagkasikop sa 72 ka mga gidudahang drug personalities.

Ang maong mga operasyon miresulta sa pagkasakmit og P69 milyones nga kantidad sa drugas ug kapin usa ka libo ka mga kaso ang ilang napasaka.

Gipasabot ni Gillamac nga bisan og daghang shabu ang nasakmit sa kapulisan dinhi sa probinsya wala sab kini nagpasabot nga naghitak na ang problema sa drugas dinhi. “It does not follow nga daghan ta’g operations sa province nga daghan sad ang droga,” pasabot ni Gillamac.

Samtang si Gillamac miila sab sa mga police stations sa probinsya nga dunay maayong trabaho batok sa ilegal nga drugas, sama sa Danao City Police, Consolacion, Liloan, Tuburan ug Balamban Police Station.

Sa nadawat karon nila nga pasidungog plano pa ni Gillamac nga pahugtan pa ang ilang kampanya batok sa mga ilegal nga kalihokan ilabi na sa problema sa shabu ug mihatag na sab kini og kamandoan sa mga hepe sa kapulisan sa probinsya nga monitoron ang mga personalidad nga nalambigit sa maong kalihokan sa tagsa tagsa nila ka mga lugar.

Lakip sa mando ni Gillamac nga subayon sa matag buhatan sa kapulisan kung posibleng anaay shabu laboratory sa ilang dapit. Hinuon gipasabot sa direktor sa CPPO nga base sa report gikan sa intelligence group sa maong buhatan wala pa hinuon silay nakuha nga impormasyon nga dunay shabu laboratory dinhi.

Gawas sa suporta sa publiko lakip sa gipasalamatan ni Gillamac ang Cebu Provincial Anti-Drug Abuse Council nga padayon nga misuporta sa kapulisan. – /EIM) (BANAT NEWS)