Nanglugos og 13 anyos dakpan

CEBU, Philippines – Nagtingkagol karon sa selda sa Barili Police Station ang usa ka 36 anyos nga construction worker human kini gitumbok nga nilugos sa ilang13 anyos nga paryente sa barangay Maghanoy lungsod sa Barili.

Ang dinakpan kansang pangalan gipugngan aron taguon ang pagkatawo sa biktima nagpuyo sa maong dapit. Matud pa sa hepe sa Women’s and Children Protection Desk (WCPD), Senior Police Officer 4 Elsa Albuera nga nahinabi sa Banat News nga ila na nga napaubos sa medico legal ang 13 anyos ug kini positibo nga nahilabtan sa suspetsado.

Basi sa saysay sa biktima sa kapulisan nga samtang sila natulog sa ilang balay kalit lang misulod ang suspetsado ug mitapad kaniya ug sa 12 anyos nga manghod lalaki sa biktima.

Sa pikas lawak natulog ang apohan sa 13 anyos apan wala nakasinggit kay gisap-ongan ang iyang baba samtang kini gilugos. Human nakabuhi ang biktima didto na kini misinggit ug nakapangayo og tabang apan dali nga misibat ang suspetsado.

Pasado alas 3 sa kadlawon napugos og adto sa buhatan sa kapulisan ang biktima kauban ang iyang apohan aron magpakitabang.

Sulay pa unta nga mihimo og pagpangita ang kapulisan apan nakasibat na ang suspetsado.

Apan niadtong Sabado sa gabii adunay nakasumbong sa mga polis nga miuli sa ilang balay ang suspetsado hinungdan nga ila sab dayon kini nga giadto hangtod nga nasikop.

Si Albuera miingon nga miuli sa ilang balay ang suspetsado kay gigutom sa iyang pagtago-tago ug nangita sab kini og iyang ilisan.

Gitug-an sab ni Albuera nga ang igsuon sa suspetsado padayon usab nga gipangita kay aduna ‘sab kini pending nga warrant of arrest sa kaso gihapon sa pagpanglugos og minor de edad nga ilaha ra usab paryente. – /EIM) (BANAT NEWS)