Wala’y garahe, dili baligyaan og sakyanan

CEBU, Philippines – Ang House Bill 5098 nga gipasaka ni Valenzuela City Congressman Sherwin Gatchalian gipaabot nga makasugat og grabe’ng pagsupak gikan sa mga tawo nga atua magpuyo sa masiot nga kabalayan.

Si LTO-7 Regional Director Arnel Tancinco mihangop niining mao nga balaudnon ug nangindahay nga maaprobahan kini sa labing dali nga panahon.

Matud ni Tancinco nga  makatabang ang mao nga balaod sa pagsulbad sa problema sa trapiko kun estrikto kini nga ipatuman sa mga tinugyanan sa balaod.

Pagka karon nakadugang sa kahuot sa kadalanan kining mga sakyanan nga anaa ra sa karsada gipangbutang kay ang tag-iya wala’y grahe.

Sigurado nga daghan ang moreklamo niini nga balaudnon, apan sa ubang kanasuran gipatuman na kini ug wala magsilbi kadtong mga misupak.

Gihulagway nga dili gayud modapig ang hukmanan sa mga tawo nga maghatag lang og kaguliyang sa trapiko ug makahatag pa og risgo kay ang ilang mga sakyanan nga anaa giparking daplin sa karsada mahimo nga madam-agan.

Daghang mga nanag-iya og sakyanan nga wala’y grahe ug ang ilang sakyanan anha ra pabuntagi sa karsada.

Ang mga tag-iya og public utility vehicles sama sa PUJ, taxi, trucks, van-for-hires ug uban pa, gimandoan gayud nga magtukod og grahe alang sa ilang mga units.

Ang paagi mao nga dili aprobahan ang ilang aplikasyon alang sa prangkisa gawas kun makapresentar sila og “sketch” ug hulagway sa ilang grahe, apan ang gihimo sa ubang operators mao nga giilad ra ang LTFRB pinaagi sa pagsumiter og sketch ug hulagway sa grahe nga dili ila.

Ang LTFRB moisyu ra ‘sab og prangkisa nga wala nila susiha kun wala ba sila gibakakan sa mga franchise applicants.

Ang LTO ibalhin sa laing lugar

Ang kadagkoan sa Land Transportation Office (LTO) nagplano nga mobalhin na lang og laing lugar human nga si Mayor Michael Rama nagtinguha nga palayason sila gikan sa mao nga dapit.

Matud ni LTO-7 Regional Director Arnel Tancinco nga nangita sila karon og laing lugar nga posible nga maabangan aron adto sila temporaryo nga magbase samtang mangita ang kagamhanan og luna nga ilang mapalit.

Ang LTO-7 Regional Office diha sa Natalio Bacalso Avenue anaa magpahimutang sa yuta nga gipanag-iya sa kagamhanan sa dakbayan sa Sugbo mao nga sila gusto na nga papahawaon ni Mayor Rama.

Matud ni Tancinco nga naglaom siya nga makakita na sila og lugar nga maayo nila nga kabalhinan.

Daghang mga motorista nga wala usab makagusto diha sa nahimutangan sa LTO-7 kay wala kini lugar nga kaparkingan sa ilang mga sakyanan.

Bisan gani ang mga patrol vehicles sa LTO maglisud sa pag-parking mao nga ang ilang compound dili na pasudlan og mga private vehicles. (BANAT NEWS)