Cebu City mideklarar og ‘gubat’ kontra Dengue

CEBU, Philippines – Mideklarar og all- out- war batok sa mga lamok nga nagdala og sakit nga dengue ang dakbayan sa Sugbo nga pasiugdahan sa Cebu City Health Dept. karong adlawa. Kini nunot sa kalit nga pagsaka sa kaso sa dengue nga gikamatay sa mga bata sulod lang niining buwan sa Septiyembre.

Gihulagway ni Dr. Daisy Villa, Cebu City Health Officer nga adunay epidemiya sa dengue nunot sa pagkamatay sa upat ka mga bata sulod lang niining buwan sa Septiyembre. Naglakip kini sa duha sa barangay Suba, usa sa barangay Pasil ug laing usa sa barangay Guadalupe, barangay Bulacao, ug Barrio Luz,. Sukad sa Enero hangtod niining buwana pito na ka mga bata ang nakalas sa dengue itandi sa upat ka namatay sa susamang mga bulan sa nakalabay’ng tuig.  Matud pa ni Villa ang walay pagpakabana sa mga tawo paglimpyo sa ilang palibot ang usa sa gitumbok nga hinungdan sa pagtaas sa kaso sa dengue dinhi sa siyudad.

Hinungdan karon adlawa ang City Health Department mopahigayon og lapad nga operasyon pagpangita sa mga itloganan sa mga lamok sa mga apektadong barangay. Mohimo sila og fogging ug misting operation lakip na ang pagbutang og chemicals sa mga kurtina ug moskitero nga makapatay sa mga lamok. Sa sulod sa siyam ka bulan ning tuiga, aduna nay 831 ka mga dengue cases ang natala sa siyudad itandi sa 762 dengue cases sa miaging tuig lakip ang upat nga namatay.

Matud pa ni Villas mas daghan karon ang nasakit og dengue tungod sa panahon ug sa kalidad sa komunidad karon. Gimandoan nila ang mga barangay health centers nga maoy mangulo sa pagpanglimpyo sa lugar labi na sa mga lugar nga adunay pundohanan sa tubig. Lakip sa gustong palimpyohan mao ang mga eskuylahan tungod didto magpundo ang mga bata panahon sa tingklase.

Si Aileen Petallar, inahan nilang Mary Angeline Petallar, 5 ug Rianne Abegail Petallar, 12 nga bag-o lang namatay tungod sa dengue, miklaro nga pirme silang manglimpyo sa ilang balay. Sa laing bahin, si Pasil Elementary School Principal Lilia Ramirez, miingon nga wa kini makuha sa eskwelahan ang maong sakit. Apan subay sa record, ang maong eskwelahan aduna nay 16 ka mga estudyanteng nagkasakit og dengue karong tuiga ug tulo niini ang namatay.

Apan matud pa ni Ramirez nga mas dako og kahigayonan nga nakuha sa mga bata ang sakit diha sa ilang balay tungod adunay intervention ang maong eskuylahan batok sa dengue. Giklaro niya  nga sa 16 ka mga kaso, 11 niini ang gikan sa barangay Suba ug lima ang gikan sa barangay Pasil. – /EIM) (BANAT NEWS)