Blocktimer sa radyo ikiha ni Carillo

CEBU, Philippines – Mopasaka og kaso si Cebu City Councilor Gerardo Carillo batok sa usa ka radio blocktimer human siya giingnan niini sa programa nga “corrupt.” Matud ni Carillo nga “below the belt” na ang mga tirada ni Nanette Garong, kinsa gituohan nga block timer sa Bando Osmeña Pundok Kauswagan, sa iyang programa sa sibyaanang dyLA. Si Carillo kanhi miyembro sa BOPK apan nitapon sa Team Rama human giapil og kiha sa P20,000 calamity assistance nga gihatag sa tanang mga empleyado.

Gihimakak ni Garong nga pagpanaot kang Carillo ang iyang gihimo ug wa siya masayod kun unsay gikasuk-an ni Carillo.

“Kung unsay akong isulti sa radio, mao na ang tinuod without any malice. Sometimes kini man gung tinuod sakit kaayo na. Unless namakak ko then akong atubangon. Importante man gud sa katawhan nga masayod kung unsay tinuod. I hope lang wala na gituyo to divert the issues niya,” sigon ni Garong kinsa miklaro usab nga dili siya binayrang block timer sa BOPK.

Ang mga isyu nga giatubang ni Carillo mao ang request sa Land Transportation Office ngadto sa Office of the Ombudsman-Visayas sa pagpa-imbestigar sa mga City Hall employees ug officials nga ilegal nga migamit sa city-issued nga mga sakyanan sa ilang personal nga katuyoan.

Ang isyu nagsugod human nakakuha ang LTO og litrato sa usa ka sakyanan nga adunay tarpaulin sa hulagway ni Carillo nga adunay videoke challenge. Apan matud ni Carillo nga mopahuwam siya sa iyang ekipo alang sa videoke challenge apan ang mga barangay lang maoy mokuha sa maong mga ekipo Laing isyu mao ang planong pagpasaka ni kanhi mayor ug kongresista Tomas Osmeña bahin sa giingong pagtugot ni Carillo sa iyang mga empleyado sa City Hall nga motrabaho sa laing restaurant atol sa oras tingtrabaho.

Apan si Carillo miklaro nga part time job lang kadto sa mga trabahante ug ang daily time record ang makapamatuod niini.

“Iya man gud giingon nga corrupt ko nga pagkatawo. Nga magdagmal ko sa akong mga anak iya sad nga pasangil nga nagpasar ta og ordinansa kabahin sa positive discipline unya numero uno kuno ko nga violator,” matud sa konsehal.

Dugang niya nga iyang gi-record ang mga alegasyon ni Garong kagahapon aron iya kining i-suporta sa iyang pagpasaka og kaso. – /EIM) (BANAT NEWS)