Pag-amendar sa Fisheries Code gikalipay sa mga mananagat

CEBU, Philippines – Mga kahugpongan sa mga mananagat nalipay sa pag-amendar na sa balaod sa panagatan ug nahingpit nang balaod ang Republic Act 1065 gikan sa giamendahang Philippine Fisheries Code. Kalakip sa giusab mao ang Implementing Rules and Regulations sa amended Fisheries Code of the Philippines. Sumala pa sa mga mananagat, gikinahanglan gyud kaayo ang pag-usab sa maong balaod karong mga panahona tungod kay kinahanglang buhion pagbalik ang kadagatan sa nasud.

Sila si Dennis Calvan ug Dr. Jose Ingles sa NGOs for Fisheries Reform, Vince Cinches sa Greenpeace-Philippines, Atty. Rocky Guzman sa Oceana Philippines, Pablo Rosales ug  Ruperto Aleroza sa Pangisda Pilipinas PKSK –National Union of Rural Based Organizations  ug ang Institute for Social Order Tambuyog Development Center Inc. mipadangat sa ilang pamahayag-pasalamat sa gobiyerno.

Matud pa sa grupo, nagpakita lang kini sa maayong liderato sa Bureau of Fisheries and Aquatic Resources ubos sa pamunoan karon ni Undersecretary for Fisheries Director Asis Perez.

Sumala pa nila, ubos kang Perez giseryuso gyud ang paghimo og mga lakang ug mga mekanismo aron mapakgang ang ilegal nga mga mananagat ug ingon man ang mga Unreported, and Unregulated (IUU) nga matang sa pagpanagat.

Dako kaayo ang ilang pagsalig nga  sa pag-amendar sa balaod mobalik ka abunda ang isda sa kadagatan.

Pinaagi usab niini, mahatagan og kahigayonan ang mga isda nga makapangitlog aron mosanay.

Gipanglantawan sa grupo nga kun mapakgang na gani ang mga dagkong mga panagatan sa ilang ilegal nga pamaagi ilabi na ang pagdili na sa commercial fishing sa kadagatan sa lokalidad, mabulahan niini ang mga gagmay nga mananagat.

Gusto sa grupo nga ibutang usab sa implementing rules and regulation ang limitasyon sa mga panagatan kun asa lang sila mahimong makapanagat, kinahanglang adunay ipatumang “harvest control” ang pag-limit sa gidaghanon sa kuhaong isda, higpit nga pag-monitor sa mga panagatan ug uban pa. (Gikan sa The Freeman/EIM)