Lalaki nang-shoplift og pangpaguwapa

CEBU, Philippines – Nasikop ang 27-anyos nga lalaki human gituohang nang-shoplift og pangpaguwapa sa usa ka mall sa barangay Sangi, dakbayan sa Toledo.

Si Norwin Chow, taga barangay Subayon, ang giingong suspek sa pagkuha sa beauty products nga pulbos ug uban pa.

Base sa imbestigasyon nga ang duty nga house detective ang nakabantay nga gikuha sa suspek ang mao’ng beauty products hinungdan nga ila kini’ng gipanid-an kun moduol sa counter area alang sa pagbayad.

Apan wala kini mobayad ug nilakaw hinungdan nga ila kini’ng gisikop.

Pabayran sa suspek ang mga produkto napulo ka pilo sa presyo samtang gitanggong sa Toledo City Police Station detention cell.

Samtang giunay sa pagpangawat ang usa ka amo sa iya’ng katabang sa barangay Bato, sa mao’ng siyudad.

Si Aida Goesens, 61, nisumbong sa kapolisan nga gikawatan siya sa iya’ng katabang nga naila sa pangan nga Marisol Martinez, 29, lumad nga taga Dipolog City.

Sa gihimo’ng imbestigasyon sa kapolisan nasayran nga nagpa-admit sa tambalanan ang biktima tungod  kay naglain ang pamati sa lawas. Nakadawat na lang og taho sa iya’ng higala nga nipahawa na ang katabang nga gibinlan sa iya’ng panimalay.

Pagsuta sa biktima nadiskubrehan nga abli na ang iya’ng jewelry box ug nahanaw ang mga alahas diin wala pa matino ang kinatibuk-ang kantidad.

Nawagtang ang kwarta sa biktima nga mobalor og P20 mil. – /GMR) (BANAT NEWS)