Mayor Radaza gi-endorsar sa bana

CEBU, Philippines – Hingpit nang gipadaplin ni kanhi Lone District Congressman ug kanhi mayor Arturo “Boy” Radaza ang iyang plano sa pagdagan pagbalik isip mayor sa umaabot nga 2016 Elections.

Kagahapon, atubangan sa dul-an sa 10,000 ka mga Oponganon didto sa Hoops Dome, sa barangay Gun-ob, pormal nga gi-endorso sa kanhi kongresista, ang iyang asawa nga si incumbent mayor Paz Radaza alang sa subli nga pagpapili niini sa maong posisyon alang sa iyang katapusang termino.

Matud niini ang maong desisyon, gibase sa resulta sa konsultasyon sa ilang mga lider ug maoy gipangayo sa katawhan sa dakbayan.

Si Mayor Radaza sa iyang bahin, nagkanayon nga nahusay na nilang magtiayon ang maong kakulian.

Atubangan sa ilang mga lider ug mga opisyal sa ilang partido nga mao ang Liberal party, mo-give way ang kanhi kongresista sa iyang asawa ug dili una magpapili sa bisan unsang posisyon.

Pormal usab nga gianunsyo sa mayor ang iyang kandidatura, sa tinguha nga mapadayon ang mga proyekto  ug programa nga iyang nasugdan sa dakbayan.

Gitug-an usab niini, nga kompleto na ang iyang line-up, diin si Vice Mayor Marcial Ycong gihapon ang iyang ika-tandem sa umaabot piniliay.

Samtang duna na kini napili nga ihulip nilang Konsehal Efren Herera, Konsehal Jhunrey Gestopa,  Konsehal Eddie Cuizon, Konsehal Floyd Pozon ug Konsehal Queenie Malingin-Aman nga mga last termers na sa pagka-konsehal.

Nagdumili pa hinoon sa pagtug-an sa iyang kompleto nga line-up ang mayor, apan ikauban gihapon niini ang mga incumbent nga konsehal sa dakbayan sa Lapu-Lapu nga duna pay nahibilin nga termino. – /EIM) (BANAT NEWS)