PRO-7 andam makigdiyalogo sa CAV

CEBU, Philippines - Andam makigdiyalogo ang Police Regional Office 7 sa Crusade Against Violence may labot na sa pagsira sa kaso sa kamatayon ni Karen Kaye Montebon.

Kini human nga namahayag si Thelma Chiong, sa CAV nga angayang susihon ang partisipasyon sa kapuyo ni Ruben Fernandez nga si Jenalyn Soon sa kamatayon ni Montebon.

Sumala pa sa Regional Director  sa PRO7 Chief Superintendent Prudencio Tom Bañas gusto niyang masayran sa CAV kun unsay nahitabo nganong naingon niini ang kaso ug wa maapil sa gikasohan si Soon.

Hinuon aron lang gyud pagsiguro, gimandoan ni Bañas ang supervisor sa Special Investigation Task Group sa pagsubay og balik sa dagan sa imbestigasyon.

Matud ni Bañas nga ila kining buhaton aron makita kun unsa gyud ang nahitabo ug aron makita nga wala silay giprotektahan.

Dugang niya nga bisan sa balay dili masiguro nga "safe" na kinahanglan gihapon nga magmabinantayon kanunay. Iya sab nga giingon nga ang kahapsay ug kalinaw dili sa kapolisan lang isalig kinahanglan sad ang suporta sa katawhan.

Iyang gihimong sanglitanan ang pagtawag sa igsuon ni Soon hinungdan nga mas nipaspas ang dagan sa kaso.  (BANAT NEWS)