Nag-date sa uyab gihapak og kahoy
CEBU, Philippines - Gihapak og kahoy ang 19-anyos nga estudyante samtang kini nakig-date sa iya’ng uyab sa Luray Uno, dakbayan sa Toledo. Ang biktima nga si Edmund Magno nisumbong sa kapolisan sa Toledo human sa mao’ng hitabo.
Asoy sa biktima nga nagkuyog sila sa iya’ng mga barkada kuyog ang ila’ng mga uyab sa gitawag og "Groto" nga lugar sa nahisgutang dapit aron unta mag-date.
Samtang naggamit ang biktima sa iya’ng cellphone, kalit nga nibutho ang wala ilhi’ng lalaki gikan sa luyo niini nga bahin.
Sa wala’y pagduha-duha kalit nga gibunalan og kahoy ang biktima nga naigo sa iya’ng nawong ug nahagba dungan sa pagkalagpot sa iya’ng cellphone.
Daling gipunit sa suspek ang cellphone dayun nibiya palayo sa lugar.
Wala mailhi ang suspek tungod kay nagtabon kini sa iya’ng nawong. (BANAT NEWS)
- Latest
