Alvin Garcia mas pabor batok del Mar

CEBU, Philippines – Giangkon sa kampo ni kanhi mayor Alvin Garcia nga pabor sila nga makig-atbang kang Kongresista Raul del Mar sa eleksiyon sa 2016 sa Cebu City North District.

Matud sa anak ni Garcia, Atty. Raymond Garcia, nga anaa sila sa administrasyon ni Mayor Michael Rama samtang wala na’y magamit nga Priority Development Assistance Fund sa Kongreso si del Mar.

Si Raymond konsehal sa barangay Camputhaw ug pangulo sa Barangay Councilors League of the Philippines (BCLP)-Cebu City Chapter. Alang kang Raymond nga dili garantiya nga nanggamot na pag-ayo si del Mar nga dili na mapukan.

Iya’ng gisanglitanan ang mga Martinez sa ikaupat nga distrito nga napukan ra gyud ni Kongresista Benhur Salimbangon sanglit gusto na sa katawhan ang kabag-ohan.

“We in the city, let’s give new person with a new vision for Cebu City, let’s give somebody chance to reign the district,” matud ni Raymond atol sa Suknaay sa SUKNA media forum kagahapon.

Si Alvin, chairman emeritus sa Kugi Uswag Sugbu (Kusug) Party, ang nagtinguha nga moatbang kang del Mar sa pagka-kongresista samtang si Raymond mopapili sa pagka-konsehal sa north district ubos sa Team Rama. (BANAT NEWS)