Way adik sa mga police chiefs

CEBU, Philippines – Negatibo sa gihimo nga drug test ang 50 ka mga police station chiefs sa Cebu Provincial Police Office nga gipaubos sa kinalit nga drug test atol sa command conference nga gihimo sa Camp General Arcadio Maxilom sa Sudlon , Lahug ning dakbayan sa Sugbo.

Apan ang hepe sa Provincial Intelligence Branch (PIB) nga si Superintendent Rodolfo Albotra miingon nga daan na siyang nagtuo nga way tiggamitan og drugas sa mga hepe sa kapulisan sa mga lungsod.

Apan iyang gipasabot nga ang maong drug test lakip sa counter-intelligence nga trabaho sa provincial headquarters aron paglimpyo sa ilang han-ay ilabi na sa mga opisyal.

Sumala pa ni Albotra nga ang CPPO sensiro sa pakigbatok kontra drugas nga maoy mando sa direktor sa kapulisan sa rehiyon 7, Chief Supt. Prudencio Bañas.

“Dili ni ma-stop, hopefully tanang kapolisan atong ma-drug test aron mahibaw-an kung kinsay involved sa illegal drugs,” matud pa ni Albotra.

Niadtong nakalabay nga Lunes ang tanan nga hepe sa kapulisan sa kalungsuran ug sa mga dakbayan sa probinsya ang gipatawag ni Sr. Supt. Noel Gillamac, direktor sa CPPO aron motambong sa command conference. Apan human sa paniudto gipahibalo sila nga adunay himuon nga drug test.

Ang mga testing kits nga gigamit gikan sa Cebu Provincial Anti-Drug Abuse Council nga padayon nga nagtabang sa kapulisan sa pakigbatok kontra problema sa drugas. – /EIM) (BANAT NEWS)