Trak de karga nalahos sa sapa

CEBU, Philippines – Maayong pagkapiyapi sa usa ka dumptruck human kini nalahos ug natagak sa sapa kilid sa usa ka taytayan diha sa sitio Tiguib, barangay Lagtang, dakbayan sa Talisay kagahapon sa kaadlawon.

Swerte hinuon ang drayber nga si Dennis Ebonalo, 37, taga Campo 4 nga nakaambak dayon apan ang iyang truck boy nga si Leonardo Villarin niuban gyud sa trak pagkatagak sa gibanabanang 10 ka tiil ka lawom padung sa ubos.

Nakaangkon og bali sa iyang tuo nga paa ug pangos sa iyang suwang si Villarin ug gidala sa tambalanan samtang si Ebonalo ang nisibat apan nitahan sa kapolisan paglabay sa pipila ka oras.

Base sa imbestigasyon sa kapulisan nasuta nga ang dump truck nga adunay plate number YCB-184 adunay kargang balas ug graba nga gibanabanang moabot sa 6-cubic meter gikan sa Camp 4 ug padung sa Tabunok.

Apan sa dihang miagi na kini sa alternatibong dalan nga tungason, nikagar ang makina hinungdan nga naatras kini ug natagak sa sapa.

Si Police Officer 1 Dennis Pasumala sa Traffic Division ang nagkanayon nga posibleng wa na maka brake ang drayber maong nalahos kini sa sapa. Si Willy Abatayo kinsa maoy project supervisor sa QM Builders nga maoy kontraktor sa pagpalapad sa karsada sa nahisgutang lugar mihulagway nga overloaded ang maong trak.

Matud pa niya nga 4 cubic meters ra ang kapasidad sa maong trak. Giklaro niya nga wala sila magkulang og pahimangno nga mag-amping ang mga motoristang molabay sa gitrabaho nilang dalan.

Si Konsehal Danny Caballero misusi sa lugar mirekomendar sa tag-iya sa QM Builders nga si Engr. Alan Quirante sa pagbutang pa og daghang signages ug mga railings. – /EIM) (BANAT NEWS)